Civilnet
Ադրբեջանի արտգործնախարար Ջեյհուն Բայրամովը Ստամբուլում անցկացված 3+3 տարածաշրջանային հարթակի հանդիպմանն անդրադարձել է Հայաստանի սահմանադրական փոփոխությունների հարցին։
«Ադրբեջանը տարածաշրջանի երկրների հետ մշակել է հայեցակարգ՝ դիմագրավելու անվտանգության, տնտեսության, առևտրի, էներգետիկայի, տրանսպորտի, կապի և շրջակա միջավայրի ոլորտներում ընդհանուր մարտահրավերներին։ Տարածաշրջանի կայունության և խաղաղության հաստատման համար [այն էլ] նման հույժ կարևոր պահի որպես հետհակամարտային ժամանակահատված կարևոր է, որ անցյալ հակամարտության հետևանքները վերացվեն սահմանադրական փոփոխությունների ճանապարհով»,- հայտարարել է Բայրամովը։
Հայաստանի կառավարաթյան պնդմամբ՝ խաղաղության պայմանագրի նախագծի 16 հոդվածից 13-ն ամբողջությամբ համաձայնեցված են, 3-ը՝ մասնակի։ Բաքուն մի քանի անգամ մերժել է արդեն համաձայնեցված հոդվածներով պայմանագիրը ստորագրելու Երևանի առաջարկը։ Ադրբեջանական կողմը նշում է, թե Հայաստանը պետք է փոխի իր Սահմանադրությունը, որում, ըստ իրենց՝ տարածքային պահանջներ կան Ադրբեջանի նկատմամբ։ Հայկական կողմը հակադարձում է և հայտարարում, որ սահմանադրական փոփոխությունների պահանջը խաղաղության պայմանագրի ստորագրումը ձգձգելու նպատակ է հետապնդում։
***
Տարածաշրջանի վեց երկրների (Թուրքիա, Ռուսաստան, Իրան, Հայաստան, Ադրբեջան և Վրաստան) համագործակցության հարթակ ստեղծելու առաջարկները հնչել են 2020-ի ղարաբաղյան պատերազմի ավարտից հետո։ 2021-ի դեկտեմբերին Մոսկվայում կայացել է 3+3 ձևաչափով նախանիստ՝ փոխարտգործնախարարների մակարդակով։ 2023-ի հոկտեմբերին Թեհրանում արդեն հանդիպել են վեց երկրների արտգործնախարարները։ Հարթակի երկու հանդիպումներին էլ Վրաստանը չի մասնակցել։
Պատմություններ
