Եթե Պուտինին հաջողվի Ուկրաինան վերածել վասալ պետության, նա չի կանգնի դրանով. Բրիտանիայի հետախուզության ղեկավար

Բրիտանական հետախուզության՝ MI6-ի ղեկավար Ռիչարդ Մուրը հայտարարել է, որ Ուկրաինայում Ռուսաստանի հաղթանակը լուրջ վտանգ կլինի արևմտյան անվտանգության համար և կարող է էապես ազդել Չինաստանի, Իրանի և Հյուսիսային Կորեայի քաղաքականության վրա:

«Եթե Պուտինին հաջողվի Ուկրաինան վերածել վասալ պետության, նա չի կանգնի դրանով»,- ասել է Մուրը Փարիզում: «Մեր՝ բրիտանական, ֆրանսիական, եվրոպական և տրանսատլանտյան անվտանգությունը վտանգված կլինի»:

MI6-ի ղեկավարը նշել է, որ Ուկրաինային աջակցություն ցուցաբերելու ծախսերը հայտնի են, սակայն չաջակցելու ծախսերն անհամեմատ ավելի բարձր կլինեն: Նրա խոսքով՝ Չինաստանը կգնահատի հետևանքները, Հյուսիսային Կորեան կոգևորվի, իսկ Իրանը կդառնա ավելի վտանգավոր:

Մուրը հանդես է եկել իր ֆրանսիացի գործընկեր Նիկոլա Լեռների հետ՝ Անտանտի (entente cordiale) 120-ամյակին նվիրված միջոցառմանը: Լեռներն ընդգծել է, որ ուկրաինական պատերազմը սպառնում է ամբողջ Եվրոպայի անվտանգությունը:

Եվրոպական պաշտոնյաները մտահոգված են, որ Թրամփի «Նախ Ամերիկան» քաղաքականությունը կարող է վտանգել տրանսատլանտյան հարաբերությունները: Այնուամենայնիվ, Մուրը վստահություն է հայտնել ԱՄՆ-ի հետ համագործակցության շարունակման հարցում: