Ալիևը ասել է՝ խաղաղության պայմանագրի որ երկու կետերը չեն համաձայնեցվել

Ադրբեջանի նախագահ Իլհամ Ալիևը հայտնել է, թե խաղաղության պայմանագրի որ կետերը չեն համաձայնեցվել Հայաստանի հետ։ Առաջինը վերաբերում է միջազգային ատյաններում փոխադարձ հայցերից հրաժարվելուն, երկրորդը՝ սահմանին այլ երկրների ներկայացուցիչներ չտեղակայելուն։

«Խաղաղության պայմանագրի հարցում մենք իրականում մեծ առաջընթաց ենք գրանցել։ Այդ փաստաթղթի 17 հոդվածներից 15-ը համաձայնեցվել են, մնացել է 2-ը: Կազանում Հայաստանի վարչապետի հետ իմ վերջին հանդիպման ժամանակ այն, ինչ ես լսեցի և զգացի, այն էր, որ այդ երկու հոդվածները համաձայնեցված չեն, բայց կարող են ընդունվել նաև Հայաստանի կողմից»,- Россия Сегодня-ի գլխավոր տնօրեն Դմիտրի Կիսելյովին տված հարցազրույցում ասել է նա։

Միևնույն ժամանակ, Ալիևը նշել է, որ մինչ խաղաղության պայմանագրի ստորագրումը Հայաստանը պետք է փոխի Սահմանադրությունը և համաձայնի ԵԱՀԿ Մինսկի խմբի լուծարմանը. «Սահմանադրության մեջ հղում կա Անկախության հռչակագրին, որն իր հերթին տարածքային պահանջներ է պարունակում Ադրբեջանի նկատմամբ, որտեղ նախկին Լեռնային Ղարաբաղի Ինքնավար Մարզը հայտարարվում է Հայաստանի մաս։ Սահմանադրության փոփոխությունը մեր քմահաճույքը չէ, դա պարզապես օբյեկտիվ պայման է»։

Ալիևի կարծիքով՝ խաղաղության պայմանագիրը և Հայաստանի միաժամանակյա սպառազինումն անհամատեղելի են։ Ըստ նրա՝ Հայաստանին զինելու գործընթացը «ընթանում է յոթ մղոնանոց քայլերով». «Այն զենքը, որը Մակրոնի կառավարությունը մատակարարում է Հայաստանին, հարձակողական մահաբեր սպառազինություն է: Այն գործնական վտանգ է ներկայացնում Ադրբեջանի համար»։

«Չնայած Արևմուտքի սպառազինությունների մեծ մասը Հայաստանը ստանում է անվճար կամ վարկով, բայց նույնիսկ այդ դեպքում նրանք մեզ հետ սպառազինությունների մրցավազքին չեն դիմանա։ Ղարաբաղյան երկրորդ պատերազմի, 2023-ի սեպտեմբերի գործողության արդյունքները չպետք է մոռացվեն նրանց կողմից։ Նրանք նաև պետք է հասկանան, որ չնայած Մակրոնի ռեժիմի, ինչպես նաև ԱՄՆ պետդեպարտամենտի աջակցությանը, եթե նրանք մեր դեմ հերթական սադրանք ծրագրեն, նրանց ոչ ոք չի օգնի այստեղ գետնի վրա»,- ասել է նա։ 

https://civilnet.am/news/809904/%d5%a1%d5%a4%d6%80%d5%a2%d5%a5%d5%bb%d5%a1%d5%b6%d5%a8-%d5%b6%d5%a1%d5%ad%d5%a1%d5%bf%d5%a5%d5%bd%d5%b8%d6%82%d5%b4-%d5%a7-%d5%bc%d5%b8%d6%82%d5%bd%d5%a1%d5%af%d5%a1%d5%b6-%d5%a6%d5%a5%d5%b6%d6%84-%d5%a3%d5%b6%d5%a5%d5%ac-%d5%a1%d5%ac%d5%ab%d6%87/