Կեղծ մրցույթ․ զեղծարարները թիրախավորում են «Յունիբանկ»-ի հաճախորդներին

Շուշան Ստեփանյան, #CivilNetCheck

Սոցցանցերում տարածվում են գովազդային գրառումներ «Յունիբանկ»-ի անունից` հայտարարությամբ, թե բանկն ամանորյա մրցույթ է անցկացնում։

«Անվճար ամանորյա նվեր։ Ռուլետկա Յունիբանկից։ Շահեք անվճար մրցանակներ, դրամաներ։ Անցեք, փորձեք ձեր բախտը»,- նշված է գրառման մեջ։

Կեղծ գովազդային տեքստը, հավանաբար, ստեղծվել է առցանց թարգմանչի՝ օրինակ՝ Google Translate-ի միջոցով, քանի որ տեքստում ակնհայտ սխալներ կան։

Ու՞ր է տանում կեղծ գրառումը

Հրապարակումը տարածվում է դեկտեմբերի 23-ին ստեղծված Aur Bis ֆեյսբուքյան էջով։

Կցված հղումը տանում է «Յունիբանկ»-ի կայքը նմանակող կեղծ էջ։ Ենթադրաբար, այս կայքը նախկինում օգտագործվել է IDram-ի անունից կեղծ գրառումներ տարածելու համար, քանի որ վերևում երևում է IDram վճարային համակարգի տարբերանշանը, որի անունից էլ պարբերաբար կեղծ խաղարկություններ են տարածվում։

Կայք այցելելուց հետո համակարգը պահանջում է մուտքագրել բանկային տվյալներ՝ իբր «պարգևը» ստանալու համար։

«Յունիբանկ»-ից ևս զգուշացնում են զեղծարարության մասին

«Յունիբանկ»-ի պաշտոնական ֆեյսբուքյան էջը Unibank OJSC-ին է։ Բանկն իր պաշտոնական ֆեյսբուքյան էջում զգուշացրել է տարածվող խարդախության մասին՝ կոչ անելով հաճախորդներին չարձագանքել չստուգված հղումներին և չմուտքագրել բանկային տվյալներն անհայտ աղբյուրներում։

Այսպիսով, «Յունիբանկ»-ի անունից տարածվող մրցանակի վերաբերյալ գրառումը կեղծ է և նպատակ ունի խարդախության միջոցով կորզել քաղաքացիների բանկային տվյալները։