Ձերբակալվել է ակտիվիստ Վահագն Չախալյանը

Ձերբակալվել է «Կամք» նախաձեռնության ղեկավար և ակտիվիստ Վահագն Չախալյանը։

Քննչական կոմիտեի նախագահի մամուլի խոսնակ Կիմա Ավդալյանը ՍիվիլՆեթին հայտնեց, որ Չախալյանը ձերբակալվել է «Սրբազան պայքար» շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստության վերաբերյալ քրեական վարույթի շրջանակում։ 

Ավդալյանը հայտնեց, որ  որ քննիչի միջնորդության հիման վրա կայացված դատախազի որոշմամբ Վահագն Չախալյանի նկատմամբ հարուցվել է քրեական հետապնդում։

«ՀՀ քրեական օրենսգրքի 43-419-րդ հոդվածի 1-ին մասով (ահաբեկչության նախապատրաստում) և 43-308-րդ հոդվածի 1-ին մասով (իշխանությունը յուրացնելուն ուղղված գործողությունների նախապատրաստում) քրեական հետապնդում է հարուցվել Վահագն Չախալյանի նկատմամբ», - ասաց Ավդալյանը:

Քննչական կոմիտեից հայտնեցին, որ Չախալյանը ձերբակալվել է՝ կալանքը որպես խափանման միջոց կիրառելու համար դատարան ներկայացնելու նպատակով։

***

Հունիսի 24-ին մերձիշխանական լրատվամիջոցներից մեկը հրապարակել էր «հեղաշրջման պլան», որը, ըստ լրատվամիջոցի, ներկայացնում է գործողությունների փուլային ծրագիր, ռեսուրսների և գործող անձանց հաշվագրում։ Այդ պլանը սկսեցին տարածել վարչապետը, վարչապետի տիկինը և իշխանական պատգամավորներ, ինչից հետո այն ուղարկվեց Քննչական կոմիտե: Այնուհետև դրան հաջորդեցին «Սրբազան պայքար» շարժման ղեկավարների, մասնակիցների և մյուս ընդդիմադիրների տներում խուզարկությունները, ձերբակալություններն ու կալանավորումները։ Կալանավորվածների թվում է «Սրբազան պայքար» շարժման ղեկավար Բագրատ արքեպիսկոպոս Գալստանյանը։