Civilnet
Ճանապարհների ապաշրջափակման ժամանակ Հայաստանի տարածքում երթևեկության անվտանգությունը Հայաստանն է ապահովելու, Արդբեջանի տարածքով՝ Ադրբեջանը։ Այս մասին Factor TV-ին ասել է ԱԺ «Քաղաքացիական պայմանագիր» խմբակցության պատգամավոր Սարգիս Խանդանյանը։
«Ինչպես Հայաստանի մյուս ենթակառուցվածքների, երկաթուղիների, ճանապարհների վրա, այնպես էլ «Թրամփի ուղու» վրա գործելու են Հայաստանի օրենքները, մեր իրավապահ մարմինները, մաքսային ծառայությունները, այստեղ դրա հակառակի մասին խոսք լինել չի կարող»,- ասել է իշխանական պատգամավորը։
Խանդանյանը չի բացառել, որ ոչ շատ հեռու ապագայում Հայաստանը՝ Ադրբեջանում, Ադրբեջանը՝ Հայաստանում, կունենան գործող դիվանագիտական ներկայացուցչություններ։
«Տրամաբանական է, որ դիվանագիտական ներկայացուցչությունները բացվեն խաղաղության պայմանագրի ուժի մեջ մտնելուց հետո։ Բայց, եթե մինչ այդ հնարավոր լինի որևէ դիվանագիտական ներկայացուցչություն ունենալ, ես կարծում եմ, Հայաստանը դեմ չի լինի դրան»,- ասել է Խանդանյանը։
Պատգամավորն ընդգծել է, որ այս պահին դեսպանատների բացման մասին ներքին խոսակցություն չկա, բայց հնարավոր զարգացում է։
***
Օգոստոսի 8-ին Սպիտակ տանը Թրամփ-Փաշինյան-Ալիև եռակողմ հանդիպման ժամանակ ստորագրվեց համատեղ հռչակագիր։ Փաստաթուղթը, որը ձևակերպվել է երեք օրինակով, Թրամփը ստորագրել է որպես վկա։ Կողմերը հաստատել են խաղաղության, բարեկեցության և կայունության ուղին՝ որպես տարածաշրջանային հարաբերությունների նոր մեկնարկային կետ։
Պատմություններ
