Civilnet
ԵԱՀԿ երկրները սեպտեմբերի 1-ին պետք է որոշում կայացնեն Մինսկի խմբի պաշտոնական լուծարման վերաբերյալ, հայտարարել է Ադրբեջանի ԱԳ նախարար Ջեյհուն Բայրամովը՝ Վաշինգտոնի հանդիպման արդյունքներին նվիրված կառավարության հատուկ նիստում։
Վաշինգտոնում օգոստոսի 8-ին Հայաստանն ու Ադրբեջանը համատեղ դիմում են ուղարկել ԵԱՀԿ գործող նախագահին՝ Մինսկի խմբի և դրան առնչվող կառույցների լուծարման վերաբերյալ։
«Կոչը տարածվել է ԵԱՀԿ երկրների միջև, և որոշումը սպասվում է սեպտեմբերի 1-ին», - ասել է Բայրամովը։
Անդրադառնալով խաղաղության համաձայնագրին՝ Բայրամովն ասել է, թե «մինչև այս տարվա հունվարի վերջը Հայաստանը համաձայն չէր խաղաղության համաձայնագրի մի շարք դրույթների հետ»։
«Մասնավորապես, Հայաստանը չի ընդունել դատարաններից հայցերի հետկանչի և սահմանին երրորդ ուժեր չտեղակայելու վերաբերյալ կետերը։ ԱՄՆ կատարած այցի ընթացքում Դոնալդ Թրամփի ներկայությամբ Ադրբեջանի և Հայաստանի ղեկավարների կողմից ստորագրված համատեղ հռչակագիրը հաստատում է Ադրբեջանի օրակարգը խաղաղության հաստատման ոլորտում», - ասել է Բայրամովը։
Ադրբեջանի ԱԳ նախարարը կրկին սահմանադրական փոփոխության նախապայմանն է ներկայացրել խաղաղության պայմանագիր կնքելու համար։
«Բաքուն ակնկալում է, որ Երևանը կփոփոխի Հայաստանի սահմանադրությունը և ամբողջությամբ կվերացնի Ադրբեջանի նկատմամբ տարածքային պահանջները՝ խաղաղության պայմանագիր կնքելու համար»,- ասել է նա։
Պատմություններ
