Շուշան Ստեփանյան
CivilNetCheck
Լրատվամիջոցներում և սոցիալական ցանցերում սեպտեմբերի 4-ին տարածվել է տեղեկություն Ղազախստանի արտաքին գործերի նախարար Մուրատ Նուրտլեուի ձերբակալության մասին:
«Չինաստանից վերադառնալուց մեկ օր անց ձերբակալվել են Ղազախստանի ԱԳ նախարարն ու բարձրաստիճան պաշտոնյաներ»,- գրել է «Հայկական ժամանակ» օրաթերթը՝ հղում անելով ղազախական լրատվամիջոցներին։
Ղազախական orda.kz կայքն իսկապես հայտնել էր ԱԳ նախարարի ձերբակալման մասին, սակայն Ղազախստանի պետական մարմինները հերքել են այս տեղեկությունը։
Ի՞նչ էր գրել ղազախական կայքը
orda.kz-ն գրել էր, թե ԱԳ նախարարը ձերբակալվել է Չինաստանում Շանհայի համագործակցության կազմակերպության գագաթնաժողովից վերադառնալուց մեկ օր անց՝ իր տանը։ Նույն աղբյուրը պնդել էր նաև, իբր ձերբակալվել են նաև ղազախ գործարար Հաջի Հաջիևը և Ազգային անվտանգության կոմիտեի մի շարք բարձրաստիճան պաշտոնյաներ։
Ավելի ուշ Ղազախստանի Ազգային անվտանգության կոմիտեն հայտարարություն է տարածել՝ հայտնելով, որ այս տեղեկությունները իրականությանը չեն համապատասխանում։ Կոմիտեն նաև հիշեցրել է, որ կեղծ տեղեկատվության տարածումը կարող է հանգեցնել քրեական պատասխանատվության։
Ղազախստանի ԱԳՆ ներկայացուցիչ Այբեկ Սմադիյարովը նույնպես հայտարարել է, որ նախարարի ձերբակալման մասին տեղեկությունները սխալ են:
«Արտաքին գործերի նախարարի ձերբակալության մասին տեղեկատվությունը չի համապատասխանում իրականությանը։ Մենք սա համարում ենք լրագրողական էթիկայի և գործող օրենսդրության խախտում», - ասել է ԱԳՆ ներկայացուցիչը։
Այպիսով, Ղազախստանի պետական մարմինները հերքում են ԱԳ նախարարի՝ ձերբակալման մասին լուրերը։
Պատմություններ
