Նաթան արքեպիսկոպոս Հովհաննիսյանը հարցաքննվել է. ՔԿ
Civilnet
Մայր Աթոռի Արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանը հարցաքննվել է: Այս մասին ՍիվիլՆեթին հայտնեցին Քննչական կոմիտեից:
«Համացանցում տարածված ձայնագրության վերաբերյալ ստացված հաղորդման առթիվ նախաձեռնված քրեական վարույթի նախաքննության ընթացքում անձը հարցաքննվել է»,- հայտնեցին ՔԿ-ից:
Իշխանական լրատվամիջոցները տարածել էին 2023-ի հոկտեմբերի հեռախոսազանգի ձայնագրություն։ Ձայնագրության մեջ Նաթան արքեպիսկոպոս Հովհաննիսյանի հետ հեռախոսազրույցում Աղան աբեղա Երնջակյանն ասում է, որ Գարեգին Երկրորդն իրեն ստիպել է մասնակցել Նիկոլ Փաշինյանի դեմ հանրահավաքի։
Հոկտեմբերի 17-ին Նաթան արքեպիսկոպոս Հովհաննիսյանի և Գարեգին Բ-ի նախկին գավազանակիր Աղան աբեղա Երնջակյանի՝ ԶԼՄ-ներում տարածված ձայնագրության հիման վրա Քննչական կոմիտեն վարույթ է հարուցել։
Հաղորդման առթիվ նախաձեռնվել է քրեական վարույթ՝ Քրեական օրենսգրքի 236-րդ հոդվածի 3-րդ մասի հատկանիշներով, այն է՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով հավաք անցկացնելուն կամ դրան մասնակցելուն խոչընդոտելը կամ հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը:
Պատմություններ
