Փաշինյանը Արարատ գյուղի եկեղեցում պատարագի մասնակցեց

Նոյեմբերի 23-ին վարչապետ Նիկոլ Փաշինյանը Արարատ գյուղի Սբ․Հակոբ եկեղեցում մասնակցեց պատարագի։

Պատարագին մասնակցում են նաև Աժ նախագահ Ալեն Սիմոնյանը, Առողջապահության նախարար Անահիտ Ավանեսյանը, Տարածքային կառավարման և ենթակառուցվածքների նախարար Դավիթ Խուդաթյանը և Ֆինանսների նախարար Վահե Հովհաննիսյանը։

Վարչապետ Նիկոլ Փաշինյանն իր հռչակած հոգևոր նորոգման շրջանակներում ամեն կիրակի պատարագների է գնում։ Այդ ամենն սկսվեց, երբ Մայր Աթոռը հոկտեմբերի 21-ին Տեր Արամ քահանային (աշխարհիկ անունը՝ Ստեփան Ասատրյան) կարգալույծ հռչակեց։ Մայր Աթոռի կարգապահական հանձնախումբը քահանային կարգալույծ է արել այն հիմնավորմամբ, որ նա դրժել է հնազանդության ուխտը, «իր հայտարարություններով վարկաբեկում է եկեղեցին ու ծառայակիցներին», վերջին մեկ ամսում պատարագներ է անում՝ շրջանցելով Վեհափառի ու թեմի առաջնորդի հիշատակության հատվածները։

Կարգալույց լինելուց հետո Ստեփան Ասատրյանը շարունակեց մնալ Հովհաննավանքում և պատարագներ մատուցել, Փաշինյանը մի քանի անգամ մասնակցեց կարգալույծ քահանայի մատուցած պատարագին։ 

Նախորդ կիրակի Փաշինյանը պատարագի մասնակցեց Խաչիկի Սուրբ Աստվածածին եկեղեցում։