Հայաստանում «Լիդլ» չի գործում, սակայն նվերներ է «խոստանում». կեղծ խաղարկություններ

Սոցցանցերում տարածվում են գրառումներ «Քարֆուր» և «Լիդլ» (Lidl) սուպերմարկետների անունից՝ խաղարկությունների և նվերների վերաբերյալ։

«Այս տարի Սուրբ Ծնունդը նշելու համար մենք ունենք հատուկ տուփ՝ լի բազմաթիվ նվերներով։ Ընտրեք ձեր հաջողության տուփը»,- նշված է «Քարֆուրի» անունից տարածվող գրառման մեջ։

«Լիդլ» սուպերմարկետների ցանցի անունից, որը Հայաստանում առհասարակ չի գործում, տարածվող գրառումները ևս խոստանում են նվերներ՝ ընդամենը օգտատիրոջ ծննդյան ամիսը գրելու դիմաց։

Իրականում սրանք խաբեություններ են, որոնց միջոցով զեղծարարները փորձում են կորզել օգտատերերի անձնական և բանկային տվյալները։ 

Նորաստեղծ էջերը բացառապես նվերների և խաղարկությունների մասին են

«Քարֆուր» սուպերմարկետների ցանցի անունից գրառումները տարածվում են «Carrfour.fans» և «Carrfour.fans․» անվանումներով ֆեյսբուքյան էջերով։ Միմյանցից ընդամենը մեկ նիշով տարբերվող այս էջերից «Carrfour.fans»-ը ստեղծվել է սեպտեմբերի 30-ին, իսկ «Carrfour.fans․»-ը՝ հոկտեմբերի 17-ին։ Երկու էջերի դեպքում էլ գրառումները բացառապես խաղարկությունների և նվերների մասին են։

Իսկ «Լիդլ» սուպերմարկետների ցանցի անունից գրառումը տարածվում է հոկտեմբերի 24-ին ստեղծված «Lidl.fans» ֆեյսբուքյան էջով։ Այս դեպքում ևս նվերի վերաբերյալ գրառումը էջի միակ ակտիվությունն է։

Ո՞րն է այս էջերի իրական նպատակը

«Քարֆուր» և «Լիդլ» սուպերմարկետների անունից տարածվող գրառումները մեկնաբանելուց հետո երկու դեպքում էլ օգտատերերից պահանջվում է տարածել այդ գրառումները ֆեյսբուքյան խմբերում՝ ապահովելու համար այդ հրապարակումների մեծ տեսանելիությունը։

Առաջին դեպքը չէ, երբ կեղծ գրառումներ են տարածվում տարբեր սուպերմարկետների անունից։ #CivilNetCheck-ը նախկինում ևս անդրադարձել է «Քարֆուր»-ի անունից տարածված կեղծ գրառումներին։

Բոլոր դեպքերում սխեման նույնն է․ նախ պահանջում են տարածել գրառումը ֆեյսբուքյան խմբերում՝ բարձրացնելով դրա դիտելիությունը, ապա ուղարկում են տվյալներ կորզող ֆիշինգային կայքի կամ վնասաբեր ծրագրեր պարունակող կայքի հղում։

Հայտնի չէ, թե որտեղից են կառավարվում այս էջերը, սակայն այս դեպքում նույնիսկ հաշվի չի առնվել այն, որ գերմանական «Լիդլ» սուպերմարկետների ցանցը Հայաստանում ընդհանրապես չի գործում։

Այսպիսով, «Քարֆուր» և «Լիդլ» սուպերմարկետների անունից տարածվող խաղարկությունների ու նվերների վերաբերյալ հրապարակումները կեղծ են։ Դրանց նպատակն է մոլորեցնել օգտատերերին՝ փորձելով կորզել նրանց անձնական, բանկային տվյալները կամ տարածել վնասաբեր ծրագրեր։