Նեթանյահուն ներում է խնդրել Իսրայելի նախագահից

Իսրայելի վարչապետ Բենիամին Նեթանյահուն ներման պաշտոնական խնդրանք է ներկայացրել նախագահ Իսահակ Հերցոգին: The Times of Israel-ի փոխանցմամբ՝ այս մասին հայտարարել է Իսրայելի նախագահի աշխատակազմը։

Ըստ ընթացակարգի՝ խնդրանքը փոխանցվել է Արդարադատության նախարարության ներման վարչություն, որտեղ նրանք կհավաքեն համապատասխան գերատեսչությունների կարծիքները: Այնուհետև նյութերը կուղարկվեն նախագահական նստավայրի իրավաբանական խորհրդատուին և նրա թիմին, որը կպատրաստի լրացուցիչ փորձագիտական ​​կարծիք Իսրայելի ղեկավարի համար։

Խնդրանքը ներառում է երկու փաստաթուղթ՝ փաստաբանի կողմից ստորագրված մանրամասն նամակ և վարչապետ Բենիամին Նեթանյահուի առանձին նամակ: Խնդրանքի հատուկ նշանակության և դրա հնարավոր հետևանքների պատճառով երկու փաստաթղթերն էլ հրապարակվել են:

Նեթանյահուի դեմ կոռուպցիայի հետաքննություն է սկսվել 2016-ի դեկտեմբերին, և նրան պաշտոնապես մեղադրանք է առաջադրվել 2019-ին: Նեթանյահուն հերքում է մեղադրանքները: Իսրայելի վարչապետը, ի թիվս այլ բաների, մեղադրվել է միլիարդատեր հոլիվուդյան պրոդյուսերից տասնյակ հազարավոր դոլարների արժողությամբ նվերներ՝ սիգարներ և շամպայն ընդունելու մեջ՝ իր անձնական և գործարար շահերի հետ կապված օգնության դիմաց: Նեթանյահուին նաև կասկածում են մեդիա մագնատներին օգնելու մեջ՝ իր և իր ընտանիքի գործունեության բարենպաստ լուսաբանման դիմաց:

Նոյեմբերի կեսերին ԱՄՆ նախագահ Դոնալդ Թրամփը միջամտեց Նեթանյահուի անունից՝ խնդրելով Հերցոգին ներում շնորհել վարչապետին: Նեթանյահուն հայտարարեց, որ կոռուպցիայի գործով ներում չի խնդրի, եթե դա նշանակի մեղքի ընդունում: