Civilnet
Հայ առաքելական եկեղեցու Գերագույն հոգևոր խորհուրդը խոստորեն դատապարտում է եպիսկոպոսների միանալը վարչապետի նախաձեռնած «եկեղեցու բարենորոգման ծրագրին». այս մասին ասվում է Մայր Աթոռի՝ հունվարի 13-ին կայացած Գերագույն հոգևոր խորհրդի ժողովի մասին տարածած հաղորդագրությունում։
Ժողովականները խստորեն դատապարտել են նաև ՏԻՄ ղեկավարների, իրավապահ և ուժային կառույցների ներգրավմամբ թեմակալ առաջնորդների կողմից եկեղեցականների նկատմամբ գործադրվող ապօրինի ճնշումներն ու սպառնալիքները։
Ամենայն հայոց կաթողիկոսի նախագահությամբ տեղի ունեցած ժողովի ընթացքում նշվել է, որ շրջանառվող «ներեկեղեցական հակադրությունների» թեզը «արհեստածին է և նպատակ ունի օրինականացնել իշխանությունների ապօրինի միջամտությունը եկեղեցու ներքին գործերին»։
Ըստ հաղորդագրության՝ 2025-ի մայիսի վերջից իշխանության նախաձեռնած հակաեկեղեցական արշավը ստացել է համակարգված բնույթ, որն ուղեկցվում է հակասահմանադրական գործողություններով, քրեական հետապնդումներով և հոգևորականների նկատմամբ բռնաճնշումներով։
«Քաղաքականության մեջ եկեղեցու ներգրավված լինելու մեղադրանքը անհիմն և անընդունելի համարելով՝ Հոգևոր խորհուրդը մերժելի նկատեց իշխող ուժի կողմից արհեստական օրակարգերի ձևավորմամբ Հայ եկեղեցին քաղաքական գործընթացների մեջ ներքաշելու փորձերը, ինչը նոր բաժանումներ ու հակառակություններ է առաջ բերում ազգային կյանքում»,- նշված է Մայր Աթոռի հաղորդագրությունում։
Խորհուրդը մտահոգություն է հայտնել տասը եպիսկոպոսների որդեգրած պառակտիչ կեցվածքի, հանրային ելույթներում Մայր Աթոռի և Ամենայն Հայոց Կաթողիկոսի հասցեին հնչեցրած զրպարտիչ հայտարարությունների ու մեղադրանքների առնչությամբ։
Գերագույն հոգևոր խորհուրդը որոշել է նախորդ տարեվերջին հրավիրված և ժամանակավորապես հետաձգված Եպիսկոպոսաց ժողովը կազմակերպել փետրվարին։
Հունվարի 4-ին վարչապետ Նիկոլ Փաշինյանը և տասը եպիսկոպոսներ «Հայ առաքելական եկեղեցու բարենորոգման վերաբերյալ» հայտարարություն ստորագրեցին՝ նշելով, թե հոգևորականների հետ ձևավորում են համակարգող խորհուրդ, որին վերապահում են Հայ Առաքելական եկեղեցու բարենորոգման կազմակերպչական գործառույթները։
…
Հայաստանի կառավարության և եկեղեցու միջև հարաբերությունները առանձնապես սրվել են 2025-ի մայիսից, երբ Ամենայն Հայոց կաթողիկոս Գարեգին Բ-ն Շվեյցարիայում մասնակցեց Արցախի վերաբերյալ միջազգային ժողովի։ Նիկոլ Փաշինյանը կաթողիկոս Գարեգին Բ-ին գահընկեց անելու արշավ է սկսել։ Մի քանի բարձրաստիճան եկեղեցական տարբեր մեղադրանքներով կալանավորվել են, իսկ նրանցից մեկը՝ Շիրակի թեմի առաջնորդ Միքայել արքեպիսկոպոս Աջապահյանը դատապարտվել է երկու տարվա ազատազրկման։
Պատմություններ
