ՄԻՊ-ն առանձնազրույցներ է ունեցել Հայաստան վերադարձած գերիների հետ

Հունվարի 15-ին Մարդու իրավունքների պաշտպան Անահիտ Մանասյանն ու ՄԻՊ ներկայացուցիչները հանդիպումներ և խորհրդապահական առանձնազրույցներ են ունեցել  Վագիֆ Խաչատրյանի, Գևորգ Սուջյանի, Դավիթ Դավթյանի և Վիգեն Էուլջեքջյանի հետ։ Այս մասին հայտնում են պաշտպանի գրասենյակից։

«Քննարկվել են մարդու իրավունքներին առնչվող հարցեր»,- ասված է հաղորդագրության մեջ:

Վագիֆ Խաչատրյանին Մարդու իրավունքների պաշտպանը տեսակցել է «Նորք-Մարաշ» բժշկական կենտրոնում։ Բժշկական կենտրոնի տնօրեն Միքայել Ադամյանի հետ Պաշտպանը քննարկել է անձի բժշկական օգնության ու սպասարկման իրավունքին առնչվող հարցեր և շնորհակալություն հայտնել բուժանձնակազմին՝ մասնագիտական և բարեխիղճ աշխատանքի համար։

Հունվարի 14-ին Գևորգ Սուջյանը, Դավիթ Դավթյանը, Վիգեն Էուլջեքջյանը և Վագիֆ Խաչատրյանը Հակարի կամրջով Ադրբեջանի Հանրապետության համապատասխան մարմինների ներկայացուցիչների կողմից հանձնվել են Հայաստանի Հանրապետության համապատասխան մարմինների ներկայացուցիչներին։

***

Ադրբեջանը 2023-ի հուլիսի 29-ին Լաչինի միջանցքում տեղադրված ապօրինի անցակետից առևանգել էր Կարմիր խաչի միջազգային կոմիտեի հովանավորության տակ գտնվող և բուժման նպատակով Հայաստան տեղափոխվող Վագիֆ Խաչատրյանին:

Բաքվում նրան շինծու մեղադրանքներ են առաջադրել՝ իբր ԼՂ առաջին պատերազմի ժամանակ «ադրբեջանցիների նկատմամբ ցեղասպանական գործողությունների մասնակցելու համար»։

2023-ի նոյեմբերին Խաչատրյանը դատապարտվել է 15 տարվա ազատազրկման։

***

Լիբանանահայ Վիգէն Էօլճեքճեանը գերեվարվել է 2020-ի պատերազմից անմիջապես հետո։ 2021-ին Էօլճեքճեանին Ադրբեջանը մեղադրանք է առաջադրել «վարձկանություն», «ահաբեկչություն», «Ադրբեջանի պետական սահմանի ապօրինի հատում» հոդվածներով: Բաքվի դատարանը 20 տարվա ազատազրկման էր դատապարտել նրան։

***

Գևորգ Սուջյանն ու Դավիթ Դավթյանը գերեվարվել էին 2020-ի նոյեմբերին՝ Արցախում մարտական գործողությունների ավարտից հետո։ Սուջյանը պատերազմի օրերին ընկերների հետ միասին օգնություն էր տեղափոխում Արցախ։ Սուջյանին ու Դավթյանին Ադրբեջանը մեղադրում է լրտեսության մեջ։ Նրանք դատապարտվել էին 15 տարվա ազատազրկման։