Դատարանը երեք ամսով երկարաձգեց Բագրատ սրբազանի կալանքը

Օգոստոսի 21-ին, Երևան քաղաքի ընդհանուր իրավասության դատարանը, դատավոր Կարեն Ֆարխոյանի նախագահությամբ, բավարարեց դատախազի միջնորդությունը և երեք ամսով երկարաձգեց «Սրբազան պայքար» շարժման առաջնորդ Բագրատ արք․ Գալստանյանի կալանքի ժամկետը։

Դատավոր Ֆարխոյանը որոշումը հիմնավորեց նրանով, որ մեղադրյալի կողմից քննությանը խոչընդոտելու և նոր հանցանք կատարելու ռիսկերը շարունակում են բարձր մնալ։ Ըստ դատարանի՝ այլընտրանքային խափանման միջոցները, ինչպիսին է գրավը կամ տնային կալանքը, այս փուլում բավարար չեն՝ Գալստանյանի պատշաճ վարքագիծն ապահովելու համար։

Որոշման հրապարակումից հետո Բագրատ սրբազանը հեգնական շնորհակալություն հայտնեց դատավորին։ 

«Լիդիա Մանթաշյայնի կալանավորումը երկարաձգելուց հետո ես գետնի տակը պիտի մտնեի, ամոթ ինձ, եթե դուրս գայի այդ միջավայրից։ Շնորհակալ եմ, որ չարեցիք այդ քայլը»,- դահլիճում հայտարարեց նա։ Մանթաշյանի կալանքի ժամկետը օգոստոսի 20-ին է երկարաձգվել նույն ժամկետով։

Այսօրվա նիստը ընթանում է առանց մեղադրյալների պաշտպանների մասնակցությամբ։ Նրանք բոյկոտել են դատական նիստը՝ պատճառաբանելով, որ դատարանը անօրինական է ձևավորվել։

Բագրատ արք. Գալստանյանը և մյուսները մեղադրվում են իշխանությունը յուրացնելու նախապատրաստության մեջ։

Ըստ մեղադրական եզրակացության՝ «Սրբազան պայքար» շարժման միջոցով սահմանադրական ճանապարհով իշխանության հասնելու նպատակն իրագործել չկարողանալուց հետո՝ 2024-ի նոյեմբերից Բագրատ սրբազանը շարժման մի շարք մասնակիցների հետ խմբի կազմում նախապատրաստվել է իշխանությունը զավթելուն։ Մեղադրանքի համաձայն՝ նրանք ձեռք են բերել «ահաբեկչություն կատարելու և իշխանությունը զավթելու համար անհրաժեշտ միջոցներ ու գործիքներ»։