Իսրայելական ավիահարվածների հետևանքով ծանր վիրավորվել է Իրանի արտաքին հարաբերությունների ռազմավարական խորհրդի նախագահ Քամալ Խարազին, իսկ նրա կինը մահացել է, նշում է Հայաստանում Իրանի դեսպանությունը։
Խարազիի վիրավորման մասին լուրերը իսրայելական կողմն ավելի վաղ էր հաղորդել, բայց Իրանը դրանք չէր հաստատել։
Քամալ Խարազին բարեփոխական թևից Իրանի նախկին նախագահ Մոհամմադ Խաթամիի կառավարությունում զբաղեցրել է արտգործնախարարի պաշտոնը (1997-2005), ինչպես նաև Իրանի նախկին հոգևոր առաջնորդ Ալի Խամենեիի խորհրդականներից էր։
Իսրայելը վերջինիս մեղադրում է Իրանի միջուկային ծրագրի հարցում կոշտ ձևակերպումների համար, ըստ որոնց՝ Խարազին ակնարկել է նաև Իրանի միջուկային ռազմավարության վերանայման մասին։
Խարազին մարտի 9-ին CNN-ին տված հարցազրույցում նշել էր ԱՄՆ-ի հետ բանակցությունների հնարավորության պատուհան չտեսնելու մասին։ Նա ասածը հիմնավորել էր վստահության պակասով։
ԱՄՆ-ն ու Իսրայելը Իրանի դեմ ռազմական գործողություններ են սկսել փետրվարի 28-ից։ Ներկայում պատերազմը ընդլայնվել է՝ ընդգրկելով Պարսից ծոցի արաբական երկրներն ու Լիբանանը։ Իսրայելական ու ամերիկյան գործողությունների հետևանքով սպանվել են Իրանի ռազմաքաղաքական էլիտայի բարձրաստիճան ներկայացուցիչներ, այդ թվում՝ Իրանի հոգևոր առաջնորդ Ալի Խամենեին։
Պատմություններ
