«Արտեմիս II» տիեզերանավը Լուսնից վերադարձել է Երկիր
ՆԱՍԱ-ի «Արտեմիս II» տիեզերանավն անվտանգ վերադարձել է Երկիր՝ ավարտելով Լուսնի շուրջը տասնօրյա ճանապարհորդությունը: Կես դարյա դադարից հետո սա առաջին թռիչքն էր Լուսնի շուրջ:
«Օրիոն» տիեզերանավը վայրէջք է կատարել Խաղաղ օվկիանոսում՝ Կալիֆոռնիայի ափերի մոտ։
Տիեզերանավի անձնակազմում ընդգրկվել են տիեզերագնացներ Ռիդ Ուայզմանը, Վիկտոր Գլովերը, Քրիստինա Կոխը և Կանադայի տիեզերական գործակալության տիեզերագնաց Ջերեմի Հանսենը։
Տիեզերանավը 13 րոպե տևած վայրէջքի ընթացքում մեծ արագությամբ մտել է մթնոլորտ և տաքացել մինչև 2,760 աստիճան Ցելսիուս։
Բարձր ջերմաստիճանի պատճառով առաջացած պլազմային շերտը կարճ ժամանակով ընդհատել է կապը անձնակազմի հետ։
Պարաշյուտների բացվելուց և արագության նվազումից հետո Orion-ը վայրէջք է կատարել օվկիանոսում։
Վերականգնողական խմբերը դուրս են բերել տիեզերագնացներին, որոնց առողջական վիճակը գնահատվում է լավ։
NASA-ի ղեկավար Ջարեդ Այզեքմանը հայտարարել է, որ գործակալությունը պատրաստ է տիեզերագնացներին Լուսին ուղարկելու հետագա առաքելություններին։
«Արտեմիս II»-ի առաքելությունը մեկնարկել էր ապրիլի 1-ին Քենեդիի անվան տիեզերական կենտրոնից՝ Space Launch System հրթիռով։ Սա Orion տիեզերանավի առաջին մարդատար թռիչքն էր ու Apollo ծրագրից ի վեր մարդկանց առաջին արշավախումբը դեպի խորը տիեզերք։
Ապրիլի 6-ին տիեզերանավը պտույտ է կատարել Լուսնի շուրջ՝ հեռանալով Երկրից ավելի քան 400 հազար կիլոմետրով։
«Արտեմիս II» առաքելությունը դարձավ դեպի Լուսին առաջին արշավախումբը 1972-ի դեկտեմբերին իրականացված Apollo 17 ծրագրից ի վեր։
Պատմություններ
