Իսլամաբադում ԱՄՆ-ի հետ կայանալիք բանակցություններին Իրանի պատվիրակությունը լիազորված է վերջնական որոշումներ կայացնելու և պարտավոր չէ լրացուցիչ խորհրդակցություններ անցկացնել Թեհրանի հետ։ Այս մասին հաղորդել է The New York Times՝ հղում անելով Իսլամական Հանրապետության պատվիրակության երեք բարձրաստիճան աղբյուրների։
Նրանց խոսքով՝ Իրանի նոր առաջնորդ Մոջթաբա Խամենեին Իսլամական Հանրապետության խորհրդարանի խոսնակ Մոհամմադ Բաղեր Ղալիբաֆին տվել է «գործարք կնքելու կամ խզելու լիազորություններ»։
Ուրբաթ գիշերը Ղալիբաֆի իրանական պատվիրակությունը ժամանել է Պակիստանի մայրաքաղաք։ Նրա կազմում են Կենտրոնական բանկի կառավարիչ Աբդոլնասեր Հեմմատին, Պաշտպանության խորհրդի քարտուղար Ալի Աքբար Ահմադիանը և արտգործնախարար Աբբաս Արաղչին։
Ապրիլի 8-ին Իրանը երկշաբաթյա հրադադարի համաձայնության է հասել Միացյալ Նահանգների հետ:
Այս համաձայնությունը ձեռք է բերվել այն բանից հետո, երբ ԱՄՆ նախագահ Դոնալդ Թրամփը հայտարարել էր, որ զերծ է մնում իրանական քաղաքակրթության ոչնչացման սպառնալիքից և երկու շաբաթով «կկասեցնի» Իրանի վրա հարձակումները։
Փետրվարի 28-ին Իսրայելն ու ԱՄՆ-ն լայնածավալ ռազմական հարձակում են սկսել Իրանի դեմ։ Հարձակման առաջին օրը սպանվել է Իրանի հոգևոր առաջնորդ Այաթոլլա Ալի Խամենեին։ Ռազմական գործողություններն ընդգրկում են Պարսից Ծոցի Արաբական երկրները։ Իրանն՝ ի պատասխան, հարվածներ է հասցնում տարածաշրջանի երկրների տարածքում տեղակայված ԱՄՆ բազաներին և Իսրայելին, և փակել է Հորմուզի նեղուցը՝ «թշնամիների համար»։ Իսրայելը հարվածում է նաև Լիբանանին։
Պատմություններ
