Սահմանադրության տեքստը պատրաստ չէ հրապարակման համար․ նախարար

Սահմանադրության տեքստը պատրաստ չէ հրապարակման համար։ Այս մասին ապրիլի 17-ին ճեպազրույցի ժամանակ հայտնել է արդարադատության նախարար Սրբուհի Գալյանը։

«Չհրապարակելը նշանակում է մի բան, որ դեռ հրապարակման համար պատրաստ չէ։ Տեքստը պատրաստ է, դրված է քննարկումների, կորոշվի երբ է հրապարակվելու»,- ասել է նախարարը։

Նախարարը փետրվարի 4-ին 2025-ի գործունեության ամփոփիչ մամուլի ասուլիսի ժամանակ հայտարարել էր, որ նոր Սահմանադրության տեքստը պատրաստ կլինի և հրապարակման ենթակա կդառնա արդեն մարտին։

Ըստ նախարարի՝ բավարար ժամանակ դեռևս չի եղել Սահմանադրության տեքստը յուրացնելու, համապատասխան առաջարկներ անելու համար, որոնք միտված են լինելու դրա փոփոխությանը, լրամշակմանը։

«Տարակարծություններ միշտ կան, որովհետև մեկանձնյա որոշումներով առաջ չենք շարժվելու։ Սահմանադրությունն այդ ծավալով անհնար է, որ տարակարծություններ չլինեն»,- ասել է Գալյանը։

Նախարարի խոսքով՝ քննարկվել է տեքստը մաս-մաս հրապարակելու տարբերակը, բայդ դեռ որոշում չկա։

***

2025-ի փետրվարին վարչապետ Նիկոլ Փաշինյանը հայտարարել է երկրում նոր սահմանադրության ընդունելու անհրաժեշտության մասին։

Նոր Սահմանադրության անհրաժեշտության մասին վարչապետը խոսել է Բաքվից հնչող պահանջների ֆոնին։ Չնայած, որ 2018-ի հեղափոխությունից հետո Փաշինյանը հայտարարել էր սահմանադրական բարեփոխումների անհրաժեշտության մասին։

Բաքուն պնդում է, որ Հայաստանի Սահմանադրության նախաբանը, որը հղում է անում Հայաստանի 1990-ի Անկախության հռչակագրին, տարածքային պահանջ է ենթադրում Ադրբեջանին, քանի որ Անկախության հռչակագիրն իր հերթին հղում է անում Հայկական ԽՍՀ-ի՝ Լեռնային Ղարաբաղի Ինքնավար Մարզի վերամիավորման մասին օրենքին։

Պաշտոնական Բաքուն պարբերաբար հայտարարում է, որ «Խաղաղության պայմանագրի ստորագրման գլխավոր պայմանը Հայաստանի Սահմանադրության փոփոխությունն է»։