ԵՄ երեք կառույցների ղեկավարները ժամանել են Հայաստան

Եվրոպական քաղաքական համայնքի (EPC) 8-րդ գագաթնաժողովին մասնակցելու նպատակով Հայաստան են ժամանել Եվրոպական խորհրդի նախագահ Անտոնիու Կոշտան, Եվրոպական հանձնաժողովի նախագահ Ուրսուլա ֆոն դեր Լայենը և Եվրոպական խորհրդարանի նախագահ Ռոբերտա Մեցոլան: Այս մասին հայտնում են կառավարության մամուլի ծառայությունից:

«Զվարթնոց» միջազգային օդանավակայանում նրանց դիմավորել է ԱԺ նախագահ Ալեն Սիմոնյանը:

Եվրոպական քաղաքական համայնքը միավորում է 47 պետություն, այդ թվում՝ ԵՄ անդամ 27 երկրները և 20 գործընկեր պետություններ, նպատակ ունենալով խթանել համագործակցությունը ժողովրդավարության ամրապնդման, տնտեսական ու էներգետիկ անվտանգության և տարածաշրջանային խնդիրների լուծման ուղղությամբ։

ԵՔՀ առաջին գագաթնաժողովը տեղի է ունեցել 2022-ի հոկտեմբերին՝ Պրահայում։ 

Այս գագաթնաժողովի շրջանակում էր, երբ Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Ֆրանսիայի նախագահի և Եվրոպական խորհրդի նախագահի միջնորդությամբ ստորագրված հայտարարությամբ ճանաչեցին միմյանց տարածքային ամբողջականությունն ու ինքնիշխանությունը՝ հղում անելով ՄԱԿ-ի կանոնադրությանը և 1991-ի Ալմա-Աթայի Հռչակագրին:

Հայաստանն իր համաձայնությունը հայտնեց՝ աջակցելու ԵՄ քաղաքացիական առաքելությանը Ադրբեջանի հետ սահմանի երկայնքով: Ադրբեջանը համաձայնեց համագործակցել նշյալ առաքելության հետ այնքանով, որքանով որ առնչություն կունենա: