Մայիսի 5-ին կայացած ԵՄ-Հայաստան առաջին գագաթնաժողովում Եվրոպական միությունը և Հայաստանը հայտարարեցին Փոխկապակցվածության գործընկերության մասին։ Ընդունված համատեղ հռչակագրի տեքստը հրապարակվել է Եվրոպական հանձնաժողովի կայքում:
Հռչակագրում նշվում է, որ «Փոխկապակցվածությունը տարածաշրջանում Եվրոպական միության առանցքային ռազմավարական առաջնահերթությունն է: Տրանսպորտային, էներգետիկ և թվային կապերի ամրապնդման միջոցով նպատակ է դրվում բացահայտել նոր տնտեսական հնարավորություններ և նպաստել երկարաժամկետ բարգավաճմանը, համագործակցությանը և կայունությանը: Այս հավակնությունն առաջ է մղվում «Global Gateway» նախաձեռնության և Միջտարածաշրջանային փոխկապակցվածության օրակարգի միջոցով, որը կապում է Եվրոպան Հարավային Կովկասի, Թուրքիայի և Կենտրոնական Ասիայի հետ»:
Փոխկապակցվածության գործընկերություն. հիմնական տարրերը
Հայաստանում այս տեսլականն առաջ մղելու նպատակով և լիովին համահունչ լինելով Հայաստանի «Խաղաղության խաչմերուկ» նախաձեռնությանը՝ ԵՄ-Հայաստան Փոխկապակցվածության գործընկերությունը կենտրոնանում է երեք առաջնահերթ ոլորտների վրա.
Տրանսպորտ. Հայաստանի միացում տարածաշրջանային տրանսպորտային ցանցերին
Էներգետիկա. կախվածությունների նվազեցում՝ միաժամանակ ամրապնդելով անվտանգությունն ու դիմակայունությունը
Թվային ոլորտ. Հայաստանի տեխնոլոգիական ներուժի բացահայտում՝ հիմնական շեշտը դնելով արհեստական բանականության (ԱԲ) և ճարտարագիտության (ինժեներիայի) վրա
Բացի այդ, մարդկանց միջև կապերի ամրապնդումը կենսական նշանակություն ունի՝ ապահովելու համար, որ ենթակառուցվածքային ներդրումները վերածվեն տևական քաղաքական, տնտեսական և հասարակական ինտեգրման: Այս մոտեցումը կնպաստի Հայաստանի ինտեգրմանն իր հարևանների հետ՝ միաժամանակ առավելագույնի հասցնելով Տրանսկասպյան միջանցքի ընձեռած օգուտները:
Առաջնահերթությունների վերածումը գործողությունների
Գործընկերությունը կխարսխվի Փոխկապակցվածության հարցերով ԵՄ-Հայաստան բարձր մակարդակի երկխոսության վրա: Այս հարթակը կմիավորի առանցքային կառույցներին և շահագրգիռ կողմերին՝ ուղղորդելու համագործակցությունը, սահմանելու ռազմավարական առաջնահերթությունները, համակարգելու ներդրումները և խթանելու կարգավորիչ դաշտերի ներդաշնակեցումը:
ԵՄ-ի կողմից վերջերս մեկնարկած «Հետաքրքրության արտահայտման հրավերը» (Call for Expressions of Interest) Հայաստանում կաջակցի Փոխկապակցվածության գործընկերության իրագործմանը՝ առաջնահերթությունները վերածելով հստակ ծրագրերի:
Պատմություններ
