ՄԻՊ-ը Վեդիում երեխաներին առնչվող դեպքի վերաբերյալ ուսումնասիրություն է սկսել

Մարդու իրավունքների պաշտպանը Վեդիում երեխաներին առնչվող դեպքի վերաբերյալ ուսումնասիրություն է իրականացնում։ Այս մասին հայտնում են ՄԻՊ գրասենյակից։

Հաղորդագրության մեջ նշվում է, որ պաշտպան Անահիտ Մանասյանը խիստ մտահոգիչ է համարում դեպքի առնչությամբ շրջանառվող տեղեկությունները։ ՄԻՊ-ը նշել է, որ դեպքի հանգամանքները պահանջում են ամբողջական և օբյեկտիվ քննություն, ինչպես նաև պատշաճ հանրային հաղորդակցություն։

Պաշտպանը նաև կոչ է արել լրատվամիջոցներին և սոցիալական հարթակների օգտատերերին չհրապարակել երեխային նույնականացնող տվյալներ՝ դպրոցի, առողջական վիճակի կամ զարգացման առանձնահատկությունների վերաբերյալ տեղեկություններ, քանի որ դրանք կարող են վնասել երեխային։

Ավելի վաղ Քննչական կոմիտեի մամուլի խոսնակ Կիմա Ավդալյանը հայտնել էր, որ փետրվարի 12-ին անչափահաս քույրերի հայրը ՆԳՆ ոստիկանության Վեդիի բաժին հաղորդում է ներկայացրել՝ հայտնելով, որ փետրվարի 8-ին Վ․Ե․-ն, օգտվելով իր դստեր անօգնական վիճակից, նրա նկատմամբ կատարել է անառակաբարո արարք։