Վեդիում բռնության ենթարկված անչափահասների հորեղբայրն ազատ է արձակվել․ փաստաբան

Վեդիում բռնության ենթարկված անչափահաս քույրերի հորեղբայրն ազատ է արձակվել. այս մասին ֆեյսբուքի իր էջում հայտնել է փաստաբան Ռուբեն Մելիքյանը:

«Ձերբակալման 72 ժամը լրանալու կապակցությամբ Վեդիում երեխաների հորեղբայրը՝ Թովմասը, ուղիղ 15:30-ին ազատ արձակվեց: Բայց ինտենսիվ քննչական գործողությունները այս պահին դեռ շարունակվում են։ Շուտով կհասկանանք մեղադրանքի հարցը», - գրել է Մելիքյանը։

Սեռական բռնության ենթարկված երեխաների հորեղբայրը ապրիլի 26-ին դանակահարել էր ենթադրյալ մանկապիղծներից Դավիթ Այնազյանին։

 Անչափահասների փաստաբան Վարդուհի Էլբակյանն ավելի վաղ մամուլի ասուլիսում հայտարարել էր, թե հորեղբոր կողմից այս քայլի պատճառը իրավապահ մարմինների անգործությունն է եղել։

Փետրվարի սկզբին Վեդի քաղաքում անչափահասների նկատմամբ բռնության դեպք է տեղի ունեցել: Անառակաբարո գործողությունների մեջ կասկածվողները Վեդիի բնակիչներ են, որոնցից մեկը 58 տարեկան է, մյուսը 65։