Կաթողիկոսն ընդունել է մշակույթի գործիչներին․ քննարկվել է եկեղեցի-պետություն հարաբերությունները

Մայիսի 16-ին Գարեգին Երկրորդն ընդունել է մշակույթի մի խումբ գործիչների, որոնք այցելել էին Մայր Աթոռ Սուրբ Էջմիածին՝ իրենց զորակցությունը հայտնելու Հայ Առաքելական Սուրբ Եկեղեցուն և Կաթողիկոսին։ Այս մասին հայտնում է Մայր Աթոռի տեղեկատվական համակարգը։

Ըստ հաղորդագրության՝ հանդիպման ընթացքում անդրադարձ է կատարվել Հայաստանում ստեղծված հասարակական-քաղաքական իրավիճակին, հասարակական կյանքում արձանագրվող զարգացումներին ու մարտահրավերներին, ինչպես նաև Եկեղեցի-պետություն հարաբերությունների ներկայիս ընթացքին։

Հանդիպմանը նաև ընդգծվել է Հայոց Եկեղեցու և հայ մտավորականության պատասխանատվությունը՝ նպաստելու արժեհամակարգային ճգնաժամի հաղթահարմանը, հանրային համերաշխության ձևավորմանը, ինչպես նաև հասարակության մեջ հոգևոր-բարոյական առողջ մթնոլորտի և միաբանության ամրապնդմանը։