Հ1-ի եթերային և թվային ենթակառուցվածքները ենթարկվել են լայնածավալ կիբերհարձակման

Վերջին օրերին Հանրային հեռուստաընկերության եթերային և թվային ենթակառուցվածքները ենթարկվել են լայնածավալ կիբերհարձակման։ Այս մասին հայտնել է Հանրային հեռուստաընկերության տնօրեն Հովհաննես Մովսիսյանը։

«Հարձակման թիրախը Եվրոպական քաղաքական համայնքի միջոցառումների հեռարձակումներին միջամտելն էր, որից հետո փորձեր են կատարվել խաթարելու նաև Հանրային հեռուստաընկերության ալիքների բնականոն հեռարձակումը։

Բարեբախտաբար, ձեռնարկված օպերատիվ և տեխնիկական միջոցառումների շնորհիվ հնարավոր է եղել կանխել խափանումները, և հարձակման փորձերը որևէ էական ազդեցություն չեն ունեցել»,- ֆեյսբուքյան իր էջում գրել է Մովսիսյանը։

Մովսիսյանը նշել է, որ տեղի ունեցածով զբաղվում են իրավապահ մարմինները: