Մեղրի, 35/65. 20:00-ից հետո քվեարկությունը շարունակած ընտրատեղամասի արդյունքները

Լիա Ավագյան

Հունիսի 7-ին կայացած Ազգային ժողովի ընտրությունների ամենաքննարկված ահազանգը Մեղրի համայնքի Ագարակ բնակավայրի 35/65 ընտրատեղամասից էր։ Մի շարք ընդդիմադիր ուժեր, լրագրողներ ահազանգեցին, որ քվեարկության համար նախատեսված ժամի ավարտից՝ 20։00-ից հետո ընտրատեղամաս են բերվել զինծառայողներ՝ քվեարկությանը մասնակցելու նպատակով։

«Անկախ դիտորդ» առաքելության ներկայացուցիչ Դանիել Իոաննիսյանը հունիսի 8-ին հայտարարեց, որ «Անկախ դիտորդը» պահանջելու է անվավեր ճանաչել 35/65 ընտրատեղամասի արդյունքները։  

Կենտրոնական ընտրական հանձնաժողովի կայքում զետեղված տվյալների համաձայն՝  35/65 ընտրատեղամասի հիմնական ցուցակում ընդգրկված է եղել 1681 ընտրող, որոնցից քվեարկությանը մասնակցել է 1315-ը։ Ձայների բաշխմամբ առաջատար է եղել «Քաղաքացիական պայմանագիր» կուսակցությունը՝ 593 ձայնով։ «Ուժեղ Հայաստան» դաշինքը ստացել է 306 ձայն, «Հայաստան» դաշինքը՝ 148, իսկ «Բարգավաճ Հայաստան» կուսակցությունը՝ 82 ձայն։

ԿԸՀ նախագահ Վահագն Հովակիմյանը հունիսի 8-ին հայտարարեց, որ խնդիրն ավելի լուրջ կլիներ, եթե ընտրական հանձնաժողովը զինվորներին զրկեր քվեարկելու իրավունքից։

«Ըստ իս՝ խնդիր կա, առավել խնդիր կլիներ, եթե տեղամասը կողպեին ու դռան դիմաց կանգնած զինվորներին զրկեին քվեարկելու իրավունքից։ Զինվորների հետ կապված իրողությունը եղել է այն, որ տվյալ դեպքում հանձնաժողովի զգալի մասը տարիքով մարդիկ են եղել։ Կեսօրից զինվորները եկել են քվեարկության, և ստեղծվել է մի պահ, որ ժամը 20:00-ին պակաս՝ զինվորները տեղամասի դռան դիմաց կանգնած են եղել։ Տեղամասային ընտրական հանձնաժողովը կանգնել է ընտրության առաջ՝ կա՛մ զինվորներին ներս թողնել և ապահովել նրանց քվեարկելու իրավունքը, կա՛մ փակել դուռը և զրկել նրանց այդ իրավունքից»,- ասել է Հովակիմյանը։

ԿԸՀ նախագահի խոսքով՝ օրենքը նախատեսում է, որ ժամը 20:00-ին տեղամասը փակվում է, սակայն այն ընտրողները, որոնք այդ պահին արդեն տեղամասում են, իրավունք ունեն քվեարկելու։ Հովակիմյանի գնահատմամբ՝ ուշադրության կենտրոնում հայտնված դեպքը պայմանավորված է եղել զինվորական ընտրողների մեծ թվով։ 

«Եթե 15-20 հոգի լիներ, դուք դա չէիք էլ նկատի»,- նշել է նա։