Ռուսաստանի նախագահ Վլադիմիր Պուտինը կսպասի Հայաստանի խորհրդարանական ընտրությունների վերջնական պաշտոնական արդյունքներին՝ նախքան վարչապետ Նիկոլ Փաշինյանին հաղթանակի կապակցությամբ շնորհավորելը։ Այս մասին հայտարարել է Կրեմլի մամուլի քարտուղար Դմիտրի Պեսկովը՝ վկայակոչելով քվեարկության ընթացքում արձանագրված հնարավոր խախտումների վերաբերյալ ստացված տեղեկությունները։
«Այստեղ կարևոր է սպասել ինչ-որ վերջնական պաշտոնական արդյունքների։ Դուք գիտեք, որ այնտեղ շատ անհասկանալի պահեր կային։ Մենք տեսել ենք բազմաթիվ հաղորդումներ տեղի ունեցած խախտումների մասին։ Այդ իսկ պատճառով մենք նախընտրում ենք, այնուամենայնիվ, սպասել ինչ-որ պաշտոնական եզրակացությունների»,- լրագրողներին ասել է Պեսկովը՝ պատասխանելով հարցին, թե արդյոք Պուտինը կշնորհավորի Փաշինյանին։
Խորհրդարանական ընտրություններին մասնակցած ընդդիմադիր ուժերից մի քանիսը դիմել են վերահաշվարկի համար։ Վերահաշվարկի արդյունքների հրապարակումից հետո «Հայաստան» դաշինքը պատրաստվում է դիմել Սահմանադրական դատարան՝ վիճարկելու ընտրության արդյունքները։
Հունիսի 9-ին ընտրատարածքային ընտրական հանձնաժողովներում դիմումների հիման վրա ընտրությունների քվեների վերահաշվարկ է սկսվել 86 ընտրատեղամասում։
ԿԸՀ-ն ամփոփել է բոլոր 2005 ընտրատեղամասի նախնական արդյունքները։ Քվեարկությանը մասնակցել է 1,477,736 ընտրող։
Նախնական տվյալներով խորհրդարան կանցնի 3 ուժ` 2 դաշինք, 1 կուսակցություն։
Կուսակցությունների դեպքում անցողիկ շեմը 4 տոկոսն է, դաշինքների դեպքում՝ 8 տոկոսը։
Նախնական արդյունքներով խորհրդարան կանցնեն հետևյալ ուժերը՝
«Քաղաքացիական պայմանագիր» կուսակցություն-727 827 քվե, 49,8 %
«Ուժեղ Հայաստան» դաշինք- 340 088 քվե, 23,28%
«Հայաստան» դաշինք- 145 113 քվե, 9,93%։
Պատմություններ
