Հանրային քրեական հետապնդում է հարուցել Կոտայքի նախկին մարզպետ Կարապետ Գուլոյան  նկատմամբ

Դատախազը հանրային քրեական հետապնդում է հարուցել Կոտայքի նախկին մարզպետ Կարապետ Գուլոյան նկատմամբ՝ արգելանքի տակ գտնվող գույքը վնասելու համար։ Հայտնում է գլխավոր դատախազությունը։

Դատախազության փոխանցմամբ՝ քրեական վարույթով պարզվել է, որ Կարապետ Գուլոյանը տեղեկացված է եղել՝ ապօրինի ծագում ունեցող գույքի բռնագանձման գործով Հակակոռուպցիոն դատարանը գույքի նկատմամբ արգելանք է կիրառել և արգելել դրա տնօրինման հետ կապված գործողությունները։

Ըստ Դատախազության՝ չնայած դրան, Կարապետ Գուլոյանը կազմակերպել է բնակելի տան արտաքին, ներքին և նկուղային պատերի վնասումը, այդ թվում՝ սալիկների ապամոնտաժումը, դռների ու պատուհանների տեղահանումը։

Կարապետ Գուլոյանը Գագիկ Ծառուկյանի փեսան է։ 

Նշենք, որ 2026-ի ապրիլին Վճռաբեկ դատարանը մասնակի բավարարել էր ՀՀ գլխավոր դատախազի տեղակալի բողոքը՝ օրինական ուժ տալով 2024 թվականի հուլիսի 1-ի Հակակոռուպցիոն դատարանի վճռին, որով Կարապետ Գուլոյանից և Ռոզա Ծառուկյանից բռնագանձվելու էին Առինջի առանձնատան շուրջ 90 տոկոսը, Ծաղկաձորի հողամասը, «ԱԿԲԱ ԲԱՆԿ»-ի 2000 բաժնետոմսը, 264 հազար դոլարի պահանջի իրավունքը, ինչպես նաև ավելի քան 1,2 միլիարդ դրամ և այլ դրամական միջոցներ։