ՆԳ նախարարը հրաժարվեց թվեր հրապարակել ՌԴ-ից ընտրությունների շրջանում ժամանած ՀՀ քաղաքացիների մասին

Ներքին գործերի նախարար Արփինե Սարգսյանը հրաժարվեց հրապարակել կոնկրետ թվեր այն մասին, թե հունիսի 7-ի խորհրդարանական ընտրությունների շրջանում քանի քաղաքացի է Ռուսաստանից ժամանել Հայաստան և քանիսն են ձերբակալվել ընտրություններին միջամտելու կասկածանքով՝ նշելով, որ քննությունը դեռ ընթացքի մեջ է։

Հունիսի 12-ին Ազգային ժողովում լրագրողները ճեպազրույցում հարցրին, թե ՆԳՆ-ն տվյալներ ունի արդյոք ընտրական շրջանում Ռուսաստանից ժամանածների թվի մասին։ «Այս պահին թվեր հրապարակել չէի ցանկանա, բայց վստահ եմ՝ գիտեք, որ ամբողջը մեր տեսադաշտում է»,- պատասխանեց Սարգսյանը՝ նշելով, որ թեման ուշադրության կենտրոնում է թե՛ ներքին գործերի նախարարության, թե՛ Ազգային անվտանգության ծառայության, թե՛ Արտաքին հետախուզության ծառայության կողմից։

Ընտրություններից եղան մի շարք հրապարակումներ, որ Ռուսաստանից Հայաստան է բերվելու շուրջ 100,000 ՀՀ քաղաքացի՝ ընդդիմադիր ուժերի օգտին քվեարկելու նպատակով։

Թեև նախարարը կոնկրետ թիվ չնշեց, նա հաստատեց, որ հարուցվել են վարույթներ, որոնցով անցնում են նաև Ռուսաստանի Դաշնությունից ժամանած ՀՀ քաղաքացիներ, և որ այդ շրջանակում կան ձերբակալումներ։ Ըստ Սարգսյանի՝ ձերբակալումներն իրականացվել են «իրավաչափ վարույթի շրջանակներում»՝ այն դեպքերում, երբ հայտնաբերվել է ընտրողի իրավունքի վրա ազդեցություն կամ ընտրական իրավունքին խոչընդոտում։ Որպես օրինակ՝ նա նշեց ընտրական իրավունքին խոչընդոտելու և անձանց հավաքագրման դեպքերը՝ հավելելով, որ ձերբակալվածներն արդեն հանձնվել են նախաքննական մարմնին։

Նախարարը չհրապարակեց նաև ձերբակալվածների ստույգ թիվը. «Եկած ձերբակալվածների թիվն այս պահի դրությամբ ասել չեմ կարող, որովհետև պրոցեսները շարունակվում են»։ Սարգսյանն ընդգծեց, որ օպերատիվ-հետախուզական միջոցառումներն ու նախաքննությունը շարունակվում են, և չբացառեց նոր ձերբակալումներ, իսկ անհրաժեշտության դեպքում՝ նաև ավելի խիստ խափանման միջոցների կիրառում։ «Մեր կյանքը չի ավարտվում միայն ընտրության օրով»,- ասաց նա։