Կենտրոնական ընտրական հանձնաժողովը ամփոփել է հունիսի 7-ի Ազգային ժողովի ընտրությունների 637 ընտրական տեղամասում իրականացված վերահաշվարկի արդյունքները։ Սակայն, տոկոսային ամփոփում դեռևս չի ներկայացվել։
«Բարգավաճ Հայաստան» կուսակցության ձայներն ավելացել են 147-ով։
Վերահաշվարկից հետո աճ է գրանցվել «Քաղաքացիական պայմանագիր» կուսակցության օգտին տրված ձայների թվի մեջ․ այն ավելացել է 1148-ով՝ հասնելով 727 820-ի։
«Ուժեղ Հայաստան» դաշինքի ձայներն ավելացել են 508-ով՝ կազմելով 340 088, իսկ «Հայաստան» դաշինքինը՝ 217-ով՝ հասնելով 145 113-ի։
Ձայների աճ է արձանագրվել նաև «Լուսավոր Հայաստան» կուսակցության (+55), «Հանրապետություն» կուսակցության (+8) և մի շարք այլ քաղաքական ուժերի դեպքում։
Միաժամանակ որոշ ուժերի քվեների թիվը նվազել է։ Ամենամեծ նվազումը գրանցվել է «Դեմոկրատիա, օրենք, կարգապահություն» կուսակցության դեպքում՝ 819 ձայնով, ինչպես նաև «Բոլորին դեմ եմ» ժողովրդավարական կուսակցության դեպքում՝ 244 ձայնով։
ԿԸՀ-ի տվյալներով՝ վերահաշվարկի արդյունքում անճշտությունների գումարային չափը 1279-ից դարձել է 1509, իսկ անվավեր քվեաթերթիկների թիվը 17 097-ից նվազել է 859-ով՝ կազմելով 16 238։
․․․
Հայաստանի խորհրդարանական ընտրությունները կայացել են հունիսի 7-ին։ Նախնական արդյունքներով անցողիկ շեմը հաղթահարել է երեք ուժ՝ «Քաղաքացիական պայմանագիր» կուսակցությունը, «Ուժեղ Հայաստան» և «Հայաստան» դաշինքները։ Քվեների հաշվարկի նախնական արդյունքով ԲՀԿ-ն ստացել է 3,996 տոկոս քվե։ Կուսակցությունների համար անցողիկ շեմը 4 %-ն է։
Հունիսի 9-ին ընտրատարածքային ընտրական հանձնաժողովներում դիմումների հիման վրա ընտրությունների քվեների վերահաշվարկ էր սկսվել։ Որոշ ընտրատեղամասի արդյունքներ էլ անվավեր են ճանաչվել։
Պատմություններ
