«Կենտրոնական ընտրական հանձնաժողովը վերաքվեարկություն չի անում, դա անելու համար պետք է լինել անկախ մարմին»․ հունիսի 14-ին ԿԸՀ-ի դիմաց ընդդիմության ցույցին այս մասին հայտնեց «Ուժեղ Հայաստանի» պատգամավորի թեկնածու Արամ Վարդևանյանը։
«Այս օրերի ընթացքում բազմաթիվ կարծիքներ են ներկայացվել, նույնիսկ դատական ակտը, որ ասում է՝ պետք է անել վերաքվեարկություն։ Ես չեմ հավատում, որ իրենք դա անելու են։ Իհարկե, մի ժամ սպասենք, ժողովուրդ ջան, կարծում եմ` այդքանը բավարար է, իրենք պետք է վերջնական որոշում կայացնեն»,- նշել է նա։
Հավաքին մասնակցում էին ընդդիմության ներկայացուցիչներ՝ խորհրդարանական և ոչ միայն։
«Բարգավաճ Հայաստան»-ը կոչ էր արել բոլորին միանալ հավաքին, իսկ այնուհետև պահանջել ընտրությունների արդյունքների չեղարկում։
ԿԸՀ-ի դիմաց հավաքին մասնակցում էր նաև բռնցքամարտիկ Իսրայել Հակոբկոխյանը։ Նա հայտարարեց, որ հացադուլ է սկսում, մինչև նոր ընտրություններ կնշանակվեն:
«Իրավունք չունեն մեր ձայնը խլել»,- նշել էր Հակոբկոխյանը։
«Հայաքվե» քաղաքացիական միավորման անդամ Մենուա Սողոմոնյանը հայտնեց, որ հույս ունի՝ ողջամտությունը կհաղթանակի։
Ըստ Կենտրոնական ընտրական հանձնաժողովի վերջնական տվյալների՝ խորհրդարան են անցնում հետևյալ ուժերը՝
«Քաղաքացիական պայմանագիր» կուսակցություն - 726 819 քվե կամ 49,7 տոկոս
«Ուժեղ Հայաստան» դաշինք - 340 006 քվե կամ 23.2 տոկոս
«Հայաստան» դաշինք - 144 983 քվե կամ 9,9 տոկոս
«Բարգավաճ Հայաստան» կուսակցությունը հավաքեց 3,989 տոկոս և չհաղթահարեց շեմը։
Պատմություններ
