Աննա Հակոբյանը վարչապետի որոշմամբ կգործուղվի ԱՄՆ

Վարչապետ Նիկոլ Փաշինյանի որոշմամբ՝ Աննա Հակոբյանը, որպես վարչապետի տիկին, հունիսի 26-ից հուլիսի 4-ը ներառյալ կգործուղվի Ամերիկայի Միացյալ Նահանգներ՝ մասնակցելու Առաջին տիկնանց համաշխարհային ակադեմիայի (Global First Ladies Academy) չորրորդ ամենամյա միջոցառմանը:

Ըստ որոշման՝ Աննա Հակոբյանի գործուղման հետ կապված փաստացի ծախսերի (օրապահիկ և գիշերավարձ) հատուցումը կապահովի վարչապետի աշխատակազմը։ 

Փետրվարին Աննա հակոբյանը հայտարարել էր, որ իր և Նիկոլ Փաշինյանի ամուսնությունն ավարտվել է։ Արձագանքելով Աննա Հակոբյանի այս հայտարարությանը, վարչապետ Նիկոլ Փաշինյանը հայտնել էր, որ հարգանքով է վերաբերվում այդ որոշմանը։

Ապրիլին Փաշինյանը լրագրողներին հայտարարել էր, որ ջանքեր է գործադրում ընտանիքը պահպանելու ուղղությամբ և ուրախ է, որ ևս մեկ շանս ունի։ Այս հայտարարությունից հետո Աննա Հակոբյանը վարչապետի հետ մասնակցել էր դեպի Գյումրի ավտոերթին։ Այդ օրվանից հետո Հակոբյանը հանրային որևէ միջոցառման չի ներկայացել վարչապետ Փաշինյանի հետ։