Դավիթ Ղազինյանը զրկվեց անձեռնմխելիությունից․ նրան կալանավորելու միջնորդություն կներկայացվի

Կենտրոնական ընտրական հանձնաժողովը բավարարեց «Ուժեղ Հայաստան» դաշինքի պատգամավորի թեկնածու Դավիթ Ղազինյանին անձեռնմխելիությունից զրկելու և նրա նկատմամբ հանրային քրեական հետապնդում հայտարարելու վերաբերյալ դատախազության միջնորդությունը։

«Ուժեղ Հայաստան» դաշինքի պատգամավորի թեկնածու Արամ Վարդևանյանը լրագրողներին հայտնեց, որ Ղազինյանին կձերբակալեն և նրան կալանավորելու միջնորդություն կներկայացնեն։

Ավելի վաղ Հակակոռուպցիոն կոմիտեն հայտնել էր, որ փաստական տվյալներ են ստացվել այն մասին, որ դաշինքի Երևանի Արաբկիր վարչական շրջանի նախընտրական գրասենյակի պատասխանատուները և թեկնածու Դավիթ Ղազինյանը համակիրների հետ նախնական համաձայնությամբ ընտրողներին կաշառք են տվել։ Շրջանառվող ձայնագրության և քննության տվյալներով՝ հնչում է պնդում, որ «Ղազինյան Դավոն 1,400,000 դրամը տվել է» ընտրողներին նյութապես շահագրգռելու նպատակով։

Մեկնաբանելով այս հայտարարությունը՝ Ղազինյանը լրագրողներին ասել է․ «Որևէ գումար որևէ մեկին չեմ տվել, ինչ վերաբերվում է ձայնագրությանը, դուք էլ եք տեսնում, այնտեղ գլխավոր դերում մաքրուհին է, այստեղ չկա իրավական ոչ մի բան: Չկա այդպիսի գումար, ես չգիտեմ ով ում է տվել, ինչ է արել, եթե անգամ տեսականորեն դա տրված լիներ, ինչ է նշանակում՝ ես մտել եմ տարածք կամ տվել եմ գումար ինչ-որ մեկին, ասել եմ սա ընտրակաշառքի գումար է, դա աբսուրդ է»։