Եվրոպական հանձնաժողովը Հայաստանին հատկացրել է 34 մլն եվրո՝ մասնավոր հատվածի վրա ռուսական առևտրային սահմանափակումների հետևանքները մեղմելու նպատակով, հայտնում է Հայաստանում Եվրամիության պատվիրակությունը։
Գումարը տրամադրվել է Եվրահանձնաժողովի նախագահ Ուրսուլա ֆոն դեր Լայենի և վարչապետ Նիկոլ Փաշինյանի հեռախոսազրույցից երկու շաբաթ անց։ Պատվիրակության հաղորդմամբ՝ դա Ֆոն դեր Լայենի հայտարարած համապարփակ աջակցության փաթեթի առաջին մասնաբաժինն է, որն ընդգրկում է առևտրի դյուրացման և համերաշխության միջոցառումներ՝ Հայաստանի տնտեսական դիմակայունությունն ամրապնդելու համար։
Աջակցությունը հիմնված է անցյալ ամիս Երևանում կայացած ԵՄ-Հայաստան առաջին գագաթնաժողովի պայմանավորվածությունների վրա։ Կողմերը մտադիր են շարունակել համագործակցությունը՝ խորացնելով գործարար կապերը և ընդլայնելով հայ արտադրողների համար շուկաների մատչելիությունը։
Սահմանափակումներից տուժած ոլորտները՝ ագրոպարենային արտադրությունը, ծաղկաբուծությունը և արտահանմանն ուղղված այլ ճյուղերը, լրացուցիչ աջակցություն կստանան առևտրի խթանման, գործարար կապերի հաստատման և շուկաների հասանելիության ծրագրերի միջոցով։
Միջոցառումների իրականացումն ուղղորդելու և մշտադիտարկելու համար ԵՄ-Հայաստան տնտեսական դիմակայունության հատուկ խումբը կանոնավոր հանդիպումներ է անցկացնում։
ԵՄ ընդլայնման հարցերով հանձնակատար Մարթա Կոսի խոսքով՝ Եվրամիությունը կանգնած է Հայաստանի կողքին որպես ինքնիշխան, ժողովրդավարական և անկախ երկրի։
«Մենք տրամադրում ենք ոչ միայն ֆինանսական աջակցություն, այլև օգնում ենք Հայաստանին ավելի հեշտացնել առևտուրն իր հարևանների և Եվրոպայի հետ։ Սա մեր ամենամոտ գործընկերներից մեկի նկատմամբ եվրոպական համերաշխության գործնական դրսևորումն է»,- ասել է նա։
ԵՄ-ն վերջին տարիներին ընդլայնել է Հայաստանին տնտեսական աջակցությունը՝ դառնալով երկրի առևտրային հարաբերությունների բազմազանեցման հիմնական գործընկերներից մեկը։
Հանձնակատար Կոսը հուլիսի 5-ին այցելելու է Հայաստան՝ համագործակցության հետագա գործնական քայլերը քննարկելու նպատակով։
Պատմություններ
