Հայկական «Տելեկոմ Արմենիա» և ադրբեջանական «Ազերտելեկոմ» ընկերությունները ստորագրել են երկկողմ համաձայնագիր, որը նախատեսում է երկու երկրների տարածքներով տարանցիկ ինտերնետի փոխանցում և մատակարարում՝ կոմերցիոն հիմունքներով։ Այս մասին հայտնել են «Տելեկոմ Արմենիա» հանրային կապերի ծառայությունից։
«Համաձայնագրի շրջանակում «Տելեկոմ Արմենիան», հանդիսանալով տարածաշրջանում առաջատար տարանցիկ օպերատոր, ընդլայնում է միջազգային ինտերնետային տրաֆիկի մատակարարման երկրների թիվը և աշխարհագրությունը՝ ապահովելով տարանցումը սեփական ենթակառուցվածքների միջոցով դեպի Ադրբեջան։
Համաձայնագիրը նպատակ ունի նպաստելու տարածաշրջանում կապուղիների դիվերսիֆիկացմանը, հեռահաղորդակցության ցանցերի հուսալիության բարձրացմանը և տելեկոմ ոլորտում համագործակցության զարգացմանը»,- հայտնում են ընկերությունից։
«Ազերտելեկոմ»-ն Ադրբեջանի խոշոր մագիստրալային ինտերնետային օպերատորներից է, որն ապահովում է երկրի կապը համաշխարհային ինտերնետային ցանցի հետ։ 2008-ին հիմնադրված ընկերությունը գործում է Azerconnect Group-ի կազմում, որը NEQSOL Holding միջազգային խմբի մաս է։ Վերջինս գործունեություն է ծավալում մի շարք երկրներում՝ էներգետիկայի, հեռահաղորդակցության, բարձր տեխնոլոգիաների և շինարարության ոլորտներում։
«Ազերտելեկոմ»-ի տարածած հաղորդագրության մեջ նշվում է, որ այս գործարքի շրջանակում «Ազերտելեկոմ»-ը սեփական ենթակառուցվածքների միջոցով ինտերնետ կապի տարանցում կապահովի Հայաստանի ուղղությամբ և կընդլայնի իր ծառայությունների աշխարհագրությունը։
«Համաձայնագրի նպատակն է դիվերսիֆիկացնել տարածաշրջանի կապի երթուղիները, մեծացնել հեռահաղորդակցության ցանցերի հուսալիությունը և զարգացնել ոլորտային համագործակցությունը»,- ասված է ադրբեջանական կապի օպերատորի տարածած հաղորդագրության մեջ։
Պատմություններ
