Մեծ Բրիտանիայի վարչապետը հայտարարել է հրաժարականի մասին

Քիր Ստարմերը հունիսի 22-ին հայտարարել է Մեծ Բրիտանիայի վարչապետի պաշտոնից հեռանալու մասին։ Նա նաև հրաժարական է ներկայացրել Լեյբորիստական կուսակցության առաջնորդի պաշտոնից։

Նա Դաունինգ սթրիթի իր նստավայրի մոտ հաստատել է, որ որոշումը կայացրել է սեփական ցածր վարկանիշի պատճառով և այդ մասին արդեն տեղեկացրել է Կառլ III թագավորին: Ստարմերը կշարունակի գլխավորել կառավարությունը մինչև հաջորդի ընտրությունը:

Ըստ Reuters գործակալության՝ Ստարմերի վարկանիշը նվազել է նվազագույն մակարդակի երկու տարի առաջ խորհրդարանական ընտրություններում լեյբորիստների հաղթանակից ի վեր:

Քաղաքական գործչի վրա ճնշումը մեծացել էր մայիսին կայացած տեղական ընտրություններում կուսակցության անհաջողության, ինչպես նաև նրա վարած կուրսի դեմ բողոքող կառավարության առանցքային անդամների հրաժարականների պատճառով:

Քիր Սթարմերը Մեծ Բրիտանիայի վարչապետ է դարձել 2024-ին՝ խորհրդարանական ընտրություններում Լեյբորիստական կուսակցության հաղթանակից հետո։

Վերջին տասնամյակում Մեծ Բրիտանիայի վարչապետերի վաղաժամ հրաժարականները դարձել են բրիտանական քաղաքականության միտումը։

Ի տարբերություն նախագահական համակարգերի, որտեղ կառավարման հստակ ժամկետներ կան, Մեծ Բրիտանիայի խորհրդարանական համակարգում վարչապետը պաշտոնավարում է այնքան ժամանակ, քանի դեռ վայելում է խորհրդարանական մեծամասնության և իր իսկ կուսակցության վստահությունը։ Եթե կուսակցության ներսում նրա դեմ ընդվզում է սկսվում, նրան ստիպում են հեռանալ առանց համապետական ընտրությունների սպասելու։