Հոդվածի թարգմանությունը՝ OC Media-ի հետ համագործակցության շրջանակում։
Մամուլի ազատության պաշտպանությամբ զբաղվող Մամուլի միջազգային ինստիտուտը (IPI) դատապարտում է Ադրբեջանում OC Media-ի կայքի արգելափակումը՝ նշելով, որ «մտահոգված է» այդ որոշմամբ։
OC Media-ն Ադրբեջանի իր ընթերցողներից արգելափակման առաջին տեղեկությունները ստացել էր հունիսի սկզբին։ Դա տեղի ունեցավ գրեթե միաժամանակ, երբ Ադրբեջանում ստեղծվեց նոր Ազգային կիբերանվտանգության գործակալությունը (NCA), որն օժտված է տեղեկատվության վերահսկողության լայն լիազորություններով։
Տե՛ս նաև՝ Ադրբեջանում արգելափակել են OC Media-ի կայքը
Այդ ժամանակից ի վեր երկրի տարբեր շրջաններից, այդ թվում՝ ադրբեջանական սերվերներից, կայք մուտք գործելու բոլոր փորձերն անհաջող են եղել՝ բացառությամբ VPN-ի օգտագործման դեպքերի։ Ադրբեջանից կայքի այցելությունների թիվը նույնպես կտրուկ նվազել է՝ հասնելով երկնիշ թվի։
Չնայած դրան՝ Ադրբեջանի իշխանությունները շարունակում են հերքել, որ արգելափակում են կայքը։
«IPI-ն միջազգային հանրությանը կոչ է անում ուժեղացնել ճնշումը Ադրբեջանի նկատմամբ՝ դադարեցնելու անկախ լրատվամիջոցների նկատմամբ ճնշումները և ազատ արձակելու բոլոր կալանավորված լրագրողներին»,- հայտարարել է կազմակերպությունը՝ նշելով, որ Ադրբեջանը «շարունակում է մնալ տարածաշրջանում լրագրողների ամենամեծ բանտարկողներից մեկը, որտեղ ներկայում կալանքի տակ է 36 լրագրող»։
Ադրբեջանն ավելի վաղ ևս արգելափակել էր մի շարք այլ անկախ լրատվամիջոցների կայքեր։
OC Media-ի կայքի արգելափակման մասին հայտնել են նաև այլ լրատվամիջոցներ, այդ թվում՝ RFE/RL-ը և On.ge-ն, ինչպես նաև մեդիա ազատության պաշտպանությամբ զբաղվող Political Prisoner Watch կազմակերպությունը։
Առանձին անդրադարձով թեման լուսաբանել է նաև վրացական իշխանամետ Imedi TV-ն՝ OC Media-ի ֆինանսավորման աղբյուրները բնութագրելով որպես «կասկածելի»։
Վերջին ամիսներին Imedi TV-ն ինքն էլ հայտնվել է միջազգային ուշադրության կենտրոնում։ Միացյալ Թագավորությունը պատժամիջոցներ էր սահմանել հեռուստաընկերության նկատմամբ՝ մեղադրելով Ռուսաստանի՝ Ուկրաինա լայնածավալ ներխուժման վերաբերյալ դիտավորյալ ապակողմնորոշող տեղեկատվություն տարածելու մեջ։
Դրանից հետո միջազգային մի շարք ընկերություններ սկսել են դադարեցնել համագործակցությունը Imedi TV-ի հետ և ուսումնասիրել, թե ինչու են իրենց ապրանքները շարունակում գովազդվել այդ հեռուստաընկերությամբ։
Պատմություններ
