Նիկոլ Փաշինյանը հունիսի 26-ին հանդիպել է Իրանի Իսլամական Հանրապետության նախագահի տեղակալ Սեյեդ Համիդ Փուրմոհամմադիի գլխավորած պատվիրակությանը։
Վարչապետը ողջունել է Իրանի փոխնախագահի այցը Հայաստան՝ ընդգծելով տարածաշրջանում խաղաղության և կայունության ամրապնդման կարևորությունը։ Նրա խոսքով՝ այդ գործընթացը կնպաստի տարածաշրջանային հարաբերությունների և համագործակցության շարունակական զարգացմանը։
Կողմերը քննարկել են Հայաստան-Իրան սահմանային ենթակառուցվածքների զարգացման ծրագրերը՝ այդ թվում երկրորդ կամրջի և նոր տերմինալի կառուցման, ինչպես նաև մաքսային ոլորտում համագործակցության խորացմանն առնչվող հարցեր։ Երկուստեք կարևորվել է նաև էներգետիկ ոլորտում փոխգործակցության ընդլայնումը։
Հանդիպման ընթացքում անդրադարձ է կատարվել ճանապարհաշինական համատեղ նախագծերին, ինչպես նաև գյուղատնտեսության, հանքարդյունաբերության և ենթակառուցվածքների ոլորտներում համագործակցության զարգացման հնարավորություններին։
Զրուցակիցները մտքեր են փոխանակել նաև տարածաշրջանային հաղորդուղիների ապաշրջափակման գործընթացների և դրա ընձեռած նոր հնարավորությունների շուրջ։
Պատմություններ
