Լոռու մարզում Փամբակ գետում հայտնաբերվել են ավտոմեքենա և տղամարդու դի։ Այդ մասին հայտնում է ՆԳՆ Փրկարար ծառայությունը։
Ըստ հաղորդագրության՝ հունիսի 27-ին ժամը 10։56-ին ահազանգ է ստացվել, որ Վանաձոր-Ալավերդի ավտոճանապարհին՝ թունելի մոտակայքում, գետում դի է նկատվել։ Ժամը 12։03-ին ստացվել է ևս մեկ ահազանգ, ըստ որի՝ Փամբակ գետում ավտոմեքենա կա:
Նախնական տվյալներով՝ Փամբակ գետում հայտնաբերվել է «Opel» մակնիշի ավտոմեքենա, իսկ դրանից մոտ 700 մետր հեռավորության վրա՝ տղամարդու դի։
Փրկարարների և ոստիկանների համատեղ գործողությունների արդյունքում ժամը 12։50-ին գետից դուրս է բերվել տղամարդու դին, իսկ ժամը 15։50-ին՝ ավտոմեքենան։
Ըստ հաղորդագրության՝ շարունակվում են վարորդին հայտնաբերելու ուղղությամբ որոնողական աշխատանքները։
Պատմություններ
