Աշնանը կներդրվեն նոր անձնագրեր, սակայն ՆԳՆ-ն «070» ծածկագրով անձնագրի վերաբերյալ դեռ լուծում չունի

Հայաստանի ներքին գործերի նախարարությունը դեռևս վերջնական որոշում չի կայացրել, թե ինչ իրավական կարգավիճակ կունենան Լեռնային Ղարաբաղից բռնի տեղահանվածների «070» ծածկագրով անձնագրերը, եթե նրանք հրաժարվեն դրանք փոխել կամ դրանց վավերականության ժամկետը լրանա: Թեև այս տարվա աշնանից նախատեսվում է ներդնել կենսաչափական անձնագրերի նոր համակարգ, հին նմուշի փաստաթղթերի հետագա շրջանառության և արտադրության հարցը մնում է անորոշ:

«Այդ լուծումը դեռ մտածված չէ, մշակված չէ, ներդրված չէ, դեռ որոշում կայացված չէ։ Ավելի ուշ այդ որոշումը կկայացվի, դեռ ժամանակ ունենք, և կհանրայնացնենք»,- ՍիվիլՆեթի հետ զրույցում «070» կոդով փաստաթղթի վերաբերյալ ասաց ՆԳՆ միգրացիայի և քաղաքացիության ծառայության պետ Նելլի Դավթյանը։

Խնդրի մյուս կարևոր կողմը, ըստ Միագրիացիայի ծառայության, վերաբերում է անձնագրերում ծննդավայրի նշմանը, որը պետք է համապատասխանի Քաղաքացիական ավիացիայի միջազգային կազմակերպության (ICAO) 9303 և Ստանդարտացման միջազգային կազմակերպության (ISO 3166) միջազգային ստանդարտներին։ ՆԳՆ Միգրացիայի ծառայության անցած տարվա ապրիլի պարզաբանմամբ, սահմանային անցման կետերում խնդիրներից խուսափելու համար անհրաժեշտ է օգտագործել բացառապես միջազգայնորեն ընդունված աշխարհագրական միավորներ։

Սա գործնականում նշանակում է, որ ծննդավայրի դաշտում «Ստեփանակերտ» կամ «ԼՂԻՄ» ձևակերպումների փոխարեն օգտագործվում է «Ադրբեջան» աշխարհագրական միավորը, քանի որ միջազգային ստանդարտով այլ նշումները կարող են խնդրահարույց լինել այլ երկրների սահմանային վերահսկողության մարմինների համար։

Մինչ օրս բազմաթիվ բողոքներ կան, որ արցախցիների նոր անձնագրերում որպես ծննդավայր նշվում է Ադրբեջանը։