IMEI համարների համակարգը չի ենթադրում անձնական տվյալների հավաքագրում․ կառավարություն

Հայաստանում բջջային հեռախոսների IMEI համարների գրանցման համակարգը չի ենթադրում քաղաքացիների անձնական տվյալների հավաքագրում կամ վերահսկողություն. միասնական շտեմարանում պահպանվելու է բացառապես սարքերի 15-նիշանոց տեխնիկական կոդը։ Այս մասին հայտնում են կառավարությունից։

«Հայաստանում նախատեսվում է ներդնել IMEI համարների գրանցման համակարգ, որի նպատակը բջջային հեռախոսների օրինական շրջանառության ապահովումն է»,- նշում են կառավարությունից։

Գործադիրից հայտնում են, որ կարգավորումը միտված է՝

- նվազեցնելու ապօրինի ներմուծված բջջային հեռախոսների շրջանառությունը,

- ապահովելու հավասար և արդար մրցակցային պայմաններ օրինական ներմուծողների համար,

- պաշտպանելու սպառողներին կեղծ կամ փոփոխված IMEI համարներով հեռախոսներից,

- ներդնելու բջջային հեռախոսների հաշվառման միասնական շտեմարան։

«Միաժամանակ կարևոր է ընդգծել, որ նախաձեռնությունը կապ չունի քաղաքացիների անձնական տվյալների հավաքագրման կամ վերահսկողության հետ։

Ստեղծվող շտեմարանում պահպանվելու է միայն սարքի 15-նիշանոց IMEI համարը՝ առանց որևէ անձնական տվյալների։

Նախաձեռնության վերաբերյալ հանրային քննարկումների ընթացքում հնչել են տարբեր հարցեր և մտահոգություններ»,- ասված է կառավարության հայտարարության մեջ։

Կառավարությունը հունիսի 25-ի նիստում հավանություն տվեց մի օրինագծի, որը պարտադիր է դարձնում երկրի յուրաքանչյուր բջջային հեռախոսի գրանցումը և արգելափակում չգրանցված սարքերը։ Այս քայլը մտահոգություն է առաջացրել կիբեռանվտանգության մասնագետների ու թվային իրավունքների պաշտպանների շրջանում։ Նրանք զգուշացնում են, որ համակարգը կարող է հող նախապատրաստել զանգվածային հսկողության համար և կրկնում է այն մոդելը, որը կիրառվում է հիմնականում ոչ ժողովրդավարական պետություններում։