Ազգային ժողովը հուլիսի 3-ին երկրորդ ընթերցմամբ և ամբողջությամբ քննարկեց «Հայաստան» դաշինքի նախկին պատգամավոր Գեղամ Նազարյանի հեղինակած օրենսդրական նախաձեռնությունը, որն ամբողջությամբ փոփոխության է ենթարկելու «Տոների և հիշատակի օրերի մասին» օրենքը։
Իշխող «Քաղաքացիական պայմանագիր»-ն այս օրենքին առաջին ընթերցման ժամանակ կողմ է արտահայտվել, կողմ էր նաև վերջնական ընդունման ժամանակ, սակայն նախագծում կատարվել են մի շարք էական փոփոխություններ՝ հիմնված կառավարության դիտողությունների վրա։
Մասնավորապես, կառավարության առաջարկով մերժվել է Հայ առաքելական եկեղեցու հինգ տաղավար տոներին հաջորդող մեռելոց օրերը կրկին որպես ոչ աշխատանքային սահմանելու դրույթը։ Հանվել է նաև այն սահմանափակումը, որով արգելվում էր տոների կամ հիշատակի օրերի հետ կապված ոչ աշխատանքային օրեր սահմանել հաջորդող կամ նախորդող հանգստյան օրերի հաշվին։
Հայաստանի Հանրապետության քաղաքացու օրվա նշման կարգը խմբագրվել է՝ հիշատակի այլ օրերի հետ հետագա համընկնումներից խուսափելու նպատակով։
Հայ կինոյի օրը կշարունակի նշվել ապրիլի 16-ին։ Չի ընդունվել տոնը «Երկրապահ-աշխարհազորայինի օր» վերանվանելու առաջարկը, այն կպահպանի «Երկրապահի օր» անվանումը։ Հայրերի օրը կնշվի հունիսի 17-ին։ Սահմանադրության և պետական խորհրդանիշների օրերը տարանջատվել են․ հուլիսի 5-ը մնացել է Սահմանադրության օր, իսկ Պետական խորհրդանիշների օր է սահմանվել օգոստոսի 23-ը։
Ազգային փոքրամասնությունների համար նախատեսված կարգավորումը վերանայվել է այնպես, որ կառավարությունը կկարողանա որոշել նրանց ազգային տոների օրերը՝ միաժամանակ պահպանելով ոչ աշխատանքային օրերի ընդհանուր քանակը չավելացնելու տրամաբանությունը։
Սահմանվել է Մեսրոպ Մաշտոցի օր՝ փետրվարի 17-ին։ Օգոստոսի 11-ը որպես Նավասարդի տոն ամրագրելու դրույթը մերժվել է՝ օրենքի կարգավորման ընդհանուր առարկայից դուրս գալու հիմնավորմամբ։ Բացի այդ, Բռնադատվածների հիշատակի օրվա համար առաջարկվող «խորհրդային տարիներին» ձևակերպումը հանվել է օրինագծից։
Սահմանվել են մարզերի օրեր, որոնք կնշվեն սեպտեմբերի 5-ին հաջորդող առաջին շաբաթ օրվանից սկսած՝ յուրաքանչյուր շաբաթ օր հստակ հերթականությամբ։ Երևանի օրվա վերաբերյալ կարգավորումները կթողնվեն անփոփոխ՝ հնարավորություն տալով ավագանուն անհրաժեշտության դեպքում այն տեղափոխել։
Պատմություններ
