Ծառուկյանի ընկերություններում հարկային ստուգումները ռիսկերի վերլուծության հիման վրա են արվում․ ՊԵԿ նախագահ

«Բարգավաճ Հայաստան» կուսակցության առաջնորդ, գործարար Գագիկ Ծառուկյանին պատկանող ընկերություններում հարկային ստուգումներն ամբողջությամբ ռիսկերի վերլուծության հիման վրա են արվում, վստահեցնում է Պետական եկամուտների կոմիտեի նախագահ Էդուարդ Հակոբյանը։

«Ընտրովիությունը մեր օրակարգում գոյություն չունի։ Մեր թիրախը ոչ թե անձն է, հատկապես Պետական եկամուտների կոմիտեի, այլ՝ բիզնես իրականացնող տվյալ իրավաբանական անձը»,- «ՍիվիլՆեթ բիզնեսի» տաղավարում ասել է ՊԵԿ նախագահը։

Հուլիսի 6-ին ձերբակալված, իսկ հաջորդ օրը երկու ամսով կալանավորված Գագիկ Ծառուկյանը մեղադրվում է խարդախության ու փողերի լվացմանն օժանդակելու մեջ, իսկ առանձին վարույթ էլ նախաձեռնվել է ապօրինի որս կատարելու դեպքի առթիվ։ Իրավապահների գործողությունների հետևանքով «Մուլտի գրուպ»-ի ընկերությունների դռները կապարակնքվել են, և աշխատանքը դադարեցվել է․ կոնցեռնի կազմից ներկայում շարունակում է գործել միայն «Արարատցեմենտ» գործարանը։

ՊԵԿ նախագահի խոսքով՝ Ծառուկյանին պատկանող ընկերություններում իրականացվող հարկային ստուգումների հիմնական մասը նախաձեռնվել է դեռևս անցյալում։ Այդ ստուգումները կազմում են ստվերի բացահայտման ուղղությամբ կոմիտեի կատարած աշխատանքի ընդամենը 1%-ը, իսկ թաքցված հարկերի բացահայտման ընդհանուր ծավալում՝ մինչև 5%-ը:

«Այսինքն, դա նշանակում է, որ մենք չունենք որևէ ընտրովիություն։ Ովքեր ունեն ստվեր, ակնհայտ մեր տիրույթում են և այդ ստուգումները իրականացվում են»,- ասել է Հակոբյանը:

Այլ տնտեսվարողների նկատմամբ իրականացված համանման գործողությունների և արձանագրված խախտումների մասին հարցին ի պատասխան՝ Էդուարդ Հակոբյանը հայտնել է, որ հարկային մարմինների կողմից բացահայտվել է շուրջ 40 մլրդ դրամի ստվերային հարկային պարտավորություն։

ՊԵԿ նախագահը հավաստիացնում է, որ ՊԵԿ-ի գործողություններում որևէ քաղաքական ենթատեքստ կամ ընտրողական վերաբերմունք չկա։

«Միշտ եղել են նման գործընթացներ, դրանց սրությունը որոշում է Քննչական կոմիտեն։ Օրինակ, եթե հարկայինի մասին խոսենք, հիմա բնական է, որ երբ որ մենք ստվեր ենք բացահայտում, ու այդտեղ շղթա է բացահայտվում, օրինակ՝ նույն փոխկապակցված իրավաբանական անձինք են տարբեր ոլորտների, բնական է, որ այդ ստուգումները շարունակվում են։ Հետո ի՞նչ է լինում․ քննություն է իրականացվում, քննության ընթացքում որոշակի հասունության է գալիս պահը, և իրականացվում են գործողություններ։ Իսկ ինչ վերաբերում է գործողությունների խստությանն ու սրությանը, ապա դրանք ավելի շատ քննչական են, և Քննչական կոմիտեն կարող է մեկնաբանել։ Իսկ ընդհանրապես մի կարևոր հարց կա․ ի՞նչ էական է, թե երբ են իրականացվում նման գործողությունները»,- ասել է ՊԵԿ նախագահը։