«Բարգավաճ Հայաստան» կուսակցության առաջնորդ Գագիկ Ծառուկյանին պատկանող «Առինջ մոլի» աշխատակիցները բողոքի ակցիա են իրականացնում առևտրի կենտրոնի մոտ։ Ոստիկանները վերահսկում են ակցիան՝ թույլ չտալով փակել ճանապարհի երթևեկելի հատվածը։
Հուլիսի 20-ին «Առինջ մոլ» առևտրի կենտրոնում քննչական գործողություններ էին կատարվել, և որոշ տաղավարի գործունեություն կասեցվել էր։
Մոլի աշխատակիցները նշում են, որ իրենց որևէ հիմնավորում չի ներկայացվել, թե ինչու են կապարակնքել իրենց տաղավարները։
«Առանց հիմնավորման, առանց ծանուցման մեր խանութները փակվել է։ Ես Քննչականում հարցրել եմ՝ ինչի երկուշաբթի, իրենք ասել են, որ դա դիտավորյալ է արվել, որ մարդ չլինի՝ չխանգարեն իրենց գործողություններին»,- լրագրողներին ասել է տաղավաներից մեկի վարձակալը։
Ակցիայի մասնակիցները նշում են, որ հնարավորություն չի տրվել խանութներից վերցնել իրենց ապրանքները։ Քննչական մարմնից նրանց հայտնել են, որ առևտրի կենտրոնը չի բացվելու և հնարավորություն է տրվելու խանութներից հանել վաճառքի իրերը։
«Մենք այդ ապրանքները տանելու տեղ չունենք։ Այսօր ոչ տնօրինությունն է մեզ հստակ պատասխան տալիս, ոչ էլ քննչականը»,- նշել է տաղավաներից մեկի վարձակալը։
Հուլիսի 6-ին Գագիկ Ծառուկյանը ձերբակալվել, ապա կալանավորվել է երկու ամսով։ Քննչական կոմիտեն հայտարարում է, որ Ծառուկյանը մեղադրվում է առանձնապես խոշոր չափերով խարդախություն և փողերի լվացում կազմակերպելու համար։ Ծառուկյանին պատկանող ընկերությունների աշխատանքը ևս կասեցվել է։ Արդեն մի քանի օր է, ինչ աշխատաողները բողոքի ակցիաներ են անում՝ պահանջելով վերականգնել իրենց աշխատանքը։
Պատմություններ
