Ծառուկյանի գործով ձերբակալվել է «Մուլտի Գրուպ» կոնցեռնի նախկին գլխավոր տնօրենը

Գործարար Գագիկ Ծառուկյանի գործով ձերբակալվել են «Մուլտի Գրուպ» կոնցեռնի նախկին գլխավոր տնօրեն Սեդրակ Առուստամյանն ու ընկերության տնօրենը՝ ավելի քան 8,1 մլրդ դրամի չարաշահումների մեղադրանքով, հայտնում են Քննչական կոմիտեից։

«Քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում քննվում է Գագիկ Ծառուկյանի և այլ անձանց կողմից առանձնապես խոշոր չափերով՝ 8 մլրդ 126 մլն 946 հազար 460 դրամին համարժեք 21 մլն 72 հազար 827 դոլար արժողության գույքերը և դրամական միջոցները խաբեությամբ հափշտակելու և փողերի լվացում կատարելու առերևույթ դեպքերի առթիվ նախաձեռնված քրեական վարույթը:

Ձեռք բերված բավարար ապացույցների հիման վրա կոնցեռնի նախկին գլխավոր տնօրեն, տնօրենների խորհրդի նախագահ Սեդրակ Առուստամյանի և ընկերության տնօրեն Արթուր Դալլաքյանի նկատմամբ հարուցվել է հանրային քրեական հետապնդում՝ առանձնապես խոշոր չափերով խարդախությանն օժանդակելու և առանձնապես խոշոր չափերով փողերի լվացմանն օժանդակելու մասին հոդվածներով»,- ասված է ՔԿ-ի հաղորդագրության մեջ:

Օգոստոսի 5-ին վարույթն իրականացնող մարմնի կողմից կայացված որոշումների հիման վրա Սեդրակ Առուստամյանը և Արթուր Դալլաքյանը ձերբակալվել են՝ դատարան ներկայացնելու նպատակով:

Նախաքննությունը շարունակվում է։

Վարչապետ Նիկոլ Փաշինյանը մայիսին քարոզարշավի ընթացքում հրապարակայնորեն սպառնացել էր ունեզրկել ընդդիմադիր գործիչ Գագիկ Ծառուկյանին։

Հուլիսի 6-ին իրավապահները խուզարկություններ էին իրականացրել «Բարգավաճ Հայաստան» կուսակցության առաջնորդ Գագիկ Ծառուկյանի առանձնատանը և նրան պատկանողմի շարք ձեռնարկություններում, ինչից հետո Ծառուկյանը կալանավորվել է։ Կապարակնքվել են նրան պատկանող մի շարք ձեռնարկություններ։