ՔՊ-ն կողմ կքվեարկի Արամ Վարդևանյանի թեկնածությանը՝ ԱԺ փոխխոսնակի պաշտոնում

ԱԺ «Քաղաքացիական պայմանագիր» խմբակցությունն անհրաժեշտ ձայներով կողմ կքվեարկի ընդդիմադիր «Ուժեղ Հայաստան» խմբակցության թեկնածու Արամ Վարդևանյանի թեկնածությանը՝ ԱԺ փոխնախագահի պաշտոնում։ Այս մասին հայտնել է «Քաղաքացիական պայմանագիր» խմբակցության ղեկավար Արուսյակ Մանավազյանը՝ օգոստոսի 10-ին՝ ԱԺ նիստի ժամանակ։

ԱԺ «Հայաստան» խմբակցության բոլոր պատգամավորները կողմ են քվեարկելու Արամ Վարդևանյանի թեկնածությանը։

««Քաղաքացիական պայմանագիր» խմբակցության 13 պատգամավոր կողմ կքվեարկի Արամ Վարդևանյանի թեկնածությանը»,- լրագրողների հետ զրույցում ասել է Մանավազյանը։

Համաձայն «Ազգային ժողովի կանոնակարգ» սահմանադրական օրենքի՝ ԱԺ փոխխոսնակ ընտրվելու համար անհրաժեշտ է պատգամավորների ընդհանուր թվի ձայների մեծամասնությունը:

Քանի որ Ազգային ժողովն ունի 105 պատգամավոր, թեկնածուի ընտրության համար պահանջվում է առնվազն 53 կողմ ձայն: Ընտրությունն իրականացվում է փակ գաղտնի քվեարկությամբ:

Համաձայն «Ազգային ժողովի կանոնակարգ» սահմանադրական օրենքի՝ Ազգային ժողովում ընդդիմադիր խմբակցությունն իրավունք ունի առաջադրելու Ազգային ժողովի նախագահի տեղակալի թեկնածու:

Ընդդիմությունն ԱԺ փոխխոսնակի թեկնածու է առաջադրել «Ուժեղ Հայաստան» խմբակցության պատգամավոր Արամ Վարդևանյանին։

Օգոստոսի 2-ին մեկնարկած 9-րդ գումարման Աժ-ն արդեն ընտրել է ԱԺ նախագահին, երկու փոխնախագահներին։

ԱԺ նախագահ է ընտրվել իշխող «Քաղաքացիական պայմանագիր» խմբակցության թեկնածու Ռուբեն Ռուբինյանը, որի թեկնածությանն ընդդիմադիր «Ուժեղ Հայաստան» խմբակցությունը դեմ է քվեարկել, «Հայաստան» խմբակցությունը չի մասնակցել քվեարկությանը։

ԱԺ փոխնախագահներ են ընտրվել «Քաղաքացիական պայմանագիր» խմբակցության թեկնածուներ Հայկ Կոնջորյանն ու Վահագն Ալեքսանյանը։ Նրանց թեկնածությանն ընդդիմադիր «Ուժեղ Հայաստան» խմբակցությունը դեմ է քվեարկել, «Հայաստան» խմբակցությունը չի մասնակցել քվեարկությանը։