Դատախազությունը պահանջում է ՊԵԿ նախկին պաշտոնյայից բռնագանձել անշարժ գույք, մեքենաներ և շուրջ 194 մլն դրամ

Հակակոռուպցիոն դատարանը վարույթ է ընդունել Գլխավոր դատախազության հայցը, որով պահանջվում է ՊԵԿ նախկին պաշտոնյա Ասատուր Սահակյանից և նրան փոխկապակցված անձանցից հօգուտ պետության բռնագանձել ապօրինի ծագում ունեցող 2 անշարժ գույք Երևանում, 4 տրանսպորտային միջոց, 4 ընկերության բաժնեմաս և ընդհանուր առմամբ ավելի քան 194 մլն դրամ, հայտնում են Գլխավոր դատախազությունից։

«Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ Պետական եկամուտների կոմիտեի մաքսանենգության դեմ պայքարի ու կրկնակի մաքսային հսկողության վարչության Գուգարքի բաժնի պետի պաշտոնը զբաղեցրած Ասատուր Համլետի Սահակյանից և վերջինիս հետ փոխկապակցված անձանցից հօգուտ Հայաստանի Հանրապետության բռնագանձել՝

•  Երևան քաղաքում գտնվող 2 անշարժ գույք.

•  4 տրանսպորտային միջոց.

• 4 իրավաբանական անձանցում մասնակցություն.

•  183 միլիոն 561 հազար դրամ՝ որպես ապօրինի դրամական միջոցների մնացորդ.

• 10 մլն 566 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել»,- ասված է հաղորդագրության մեջ։