Մհեր Գրիգորյանի՝ Ալիևի առջև «խոնարհվելու» լուսանկարը կեղծ է

Համացանցում սեպտեմբերի 2-ից լայն տարածում է ստացել լուսանկար, որում ՀՀ փոխվարչապետ Մհեր Գրիգորյանը, իբրև թե, խոնարհվում է Ադրբեջանի նախագահ Իլհամ Ալիևի առջև՝ Բիշքեկում Հայաստանի և Ադրբեջանի պատվիրակությունների հանդիպման ժամանակ։

Լուսանկարը տարբեր մեկնաբանություններով սոցիալական ցանցերում տարածել են մի շարք հանրային գործիչներ, լրագրողներ և էջեր։ Հրապարակումներին կից գրվել է, մասնավորապես, «Մեր օրեր», «Առանց մեկնաբանության», «Կտավ՝ «Կզած Մհերը»», ինչպես նաև՝ «Սրա և մյուսների անունները պետք է կզած լինի, ինչպես իրենց էությունը»(1, )։ Լուսանկարը հայտնվել է նաև լրատվամիջոցներում, մասնավորապես՝ Oragir.news-ում և Hraparak.am-ում (ֆեյսբուքյան էջում)։

Սակայն հանդիպման պաշտոնական տեսանյութերի ուսումնասիրությունից պարզ է դառնում, որ նման դրվագ չի եղել։ «Փաստերի ստուգման հարթակի» մեր գործընկերները արդեն իսկ անդրադարձել են տարածվող լուսանկարին և պարզել, որ այն կեղծ է։ 

Ի՞նչ է երևում հանդիպման տեսանյութերում

Օգոստոսի 31-ին Բիշքեկում՝ Շանհայի համագործակցության կազմակերպության գագաթնաժողովի շրջանակում, տեղի էր ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։ Հայաստանի պատվիրակության կազմում էր նաև փոխվարչապետ Մհեր Գրիգորյանը, որը հանդիպման սկզբում ձեռքսեղմումով ողջունում է Ալիևին։

Տարածվող «սկանդալային» լուսանկարը ցածր որակի է և տպավորություն է, որ այն հանդիպման տեսագրությունից առանձնացված կադր է։

Երկու պատվիրակությունների անդամների ձեռքսեղմման հատվածը հրապարակված է ՀՀ կառավարության պաշտոնական կայքում։ Տեսանյութում երևում է, որ Ալիևի հետ ձեռքսեղմման պահին Գրիգորյանը մարմնով փոքր-ինչ առաջ է գալիս, սակայն գլուխը չի խոնարհում այնպես, ինչպես պատկերված է տարածվող լուսանկարում։

#CivilNetCheck-ն ուսումնասիրեց նաև ադրբեջանական աղբյուրներում հրապարակված տեսանյութերը։ Baku TV-ի տեսագրությունում նույն ձեռքսեղմման պահը երևում է մեկ այլ անկյունից․ այստեղ ևս տեսանելի է, որ Գրիգորյանը գլուխը չի խոնարհում այնպես, ինչպես ներկայացված է տարածվող լուսանկարում։

Fip.am-ը նաև տարածվող լուսանկարը համադրել էր պաշտոնական տեսանյութի համապատասխան կադրերի հետ՝ ցույց տալով, որ այն չի համապատասխանում իրականությանը և մոլորեցնող է։

Այսպիսով, տարածվող լուսանկարը կեղծ է․ հանդիպման հասանելի տեսագրություններից ոչ մեկում Մհեր Գրիգորյանը Ալիևի առջև այնպես չի խոնարհվում, ինչպես պատկերված է լուսանկարում։

Հատկանշական է, որ այն  առաջին տարածողների թվում է նաև քաղաքագետ Գագիկ Համբարյանը, որը օրեր առաջ Բիշքեկում Փաշինյան-Ալիև հանդիպման վերաբերյալ մեկ այլ մոլորեցնող պնդում էր արել՝ նշելով, թե միայն այդ հանդիպման ժամանակ են բացակայել Հայաստանի և Ադրբեջանի դրոշները։ Մինչդեռ #CivilNetCheck-ը ցույց էր տվել, որ Ալիևի՝ նույն այցի ընթացքում ունեցած առնվազն երկու այլ հանդիպումների ժամանակ ևս դրոշներ տեղադրված չեն եղել։

Տես՝ Բիշքեկում դրոշները բացակայել են նաև Ալիևի մյուս հանդիպումների ժամանակ