ՌԴ-ի և ԱՄՆ-ի ներկայացուցիչների նոր հանդիպումը տեղի կունենա առաջիկա շաբաթներին

Ռուսաստանի և ԱՄՆ-ի ներկայացուցիչների միջև հարաբերություններում առկա խնդիրների վերացման հարցով նոր հանդիպումը նախատեսվում է անցկացնել առաջիկա շաբաթներին։ Այս մասին «ՌԻԱ Նովոստի»-ին հայտնել է ՌԴ ԱԳ նախարարի տեղակալ Սերգեյ Ռյաբկովը։

Նրա խոսքով՝ նման հանդիպումները պարբերական բնույթ են ստացել։

«Մենք կարծում ենք, որ դա օգտակար է։ Այլ հարց է, որ բովանդակային առաջընթացի տեմպը ցանկալիից և ակնկալվածից ցածր է։ Այնուամենայնիվ, մենք դրանից չենք հրաժարվում և շարունակելու ենք առաջ շարժվել»,- ասել է Ռյաբկովը։

ՌԴ ԱԳՆ փոխնախարարը հունիսի վերջին հայտնել էր, որ Մոսկվայի և Վաշինգտոնի միջև երկկողմ հարաբերություններում առկա խնդիրների շուրջ երկխոսությունը կանգ է առել, սակայն հնարավոր են փորձագիտական խորհրդակցություններ։

Ավելի ուշ ՌԴ ԱԳՆ խոսնակ Մարիա Զախարովան հայտարարել էր, որ հաջորդ շփման ժամկետները քննարկվում են։