ԱՄՆ-ում օդային երթևեկության կառավարման համակարգի խափանման հետևանքով նոյեմբերի 13-14-ին չեղարկվել է շուրջ 14,500 չվերթ, ևս ավելի քան 11,000-ն ուշացել է։ Տասնյակ հազարավոր ուղևորներ մնացել են օդանավակայաններում։ Երկիրը փորձում է վերականգնել բնականոն օդային հաղորդակցությունը՝ 2001-ի սեպտեմբերի 11-ի ահաբեկչություններից ի վեր թռիչքների համազգային ամենաերկար դադարեցումից հետո, գրում է Reuters-ը։
Նոյեմբերի 14-ին ամերիկյան ավիաընկերությունները չեղարկել են շուրջ 4,500 չվերթ, ևս 4,400-ն ուշացել է։ Նախորդ օրը՝ նոյեմբերի 13-ին, չեղարկվել էր գրեթե 10,000 չվերթ, իսկ ավելի քան 7,000-ն իրականացվել էր ուշացումով։
Խափանման պատճառով ԱՄՆ Դաշնային ավիացիոն վարչությունը (FAA) ուրբաթ գրեթե հինգ ժամով դադարեցրել էր երկրի տարածքում օդանավերի գրեթե բոլոր թռիչքները։ Սահմանափակումը հանվել է ուրբաթ երեկոյան, սակայն դրա հետևանքները շարունակվել են նաև շաբաթ օրը։
Ամենախոշոր ավիաընկերությունները զգալի կորուստներ են կրել։ Delta Air Lines-ը, United Airlines-ը և American Airlines-ը շաբաթ օրը չեղարկել են իրենց չվերթների շուրջ 20 տոկոսը, իսկ JetBlue-ն՝ 40 տոկոսը։ Ավիաընկերությունները ուղևորներին հնարավորություն են տվել առանց լրացուցիչ վճարի փոխել տոմսերի ամսաթվերը։
Ինչն է խափանման պատճառը
ԱՄՆ տրանսպորտի նախարար Շոն Դաֆիի խոսքով՝ խափանումը կապված է ավիացիոն համակարգի տեխնիկական սպասարկումն իրականացնող L3Harris ընկերության կողմից նոր ցանցային սարքավորման տեղադրման հետ։
Նախարարի փոխանցմամբ՝ դեռ պարզ չէ՝ խնդիրը պայմանավորված է եղել մասնագետների սխալո՞վ, թե՞ տեղադրված սարքավորման անսարքությամբ։
Խափանման հետևանքով հաղորդակցության կենտրոնները գերբեռնվել են։ Յուրաքանչյուր չորսից հինգ վայրկյանը մեկ գրանցվել է ավելի քան հազար միացման փորձ, ինչն ազդել է օդանավերի հետ կապի և որոշ ռադարային համակարգերի աշխատանքի վրա։
Խնդիրն ընդգրկել է ԱՄՆ օդային երթևեկությունը վերահսկող 22 տարածաշրջանային կենտրոններից 17-ը։
Սկզբում իշխանությունները դիտարկել են նաև կիբերհարձակման հավանականությունը։ Սպիտակ տանը հրավիրվել է արտակարգ խորհրդակցություն, սակայն հետագայում պաշտոնյաները խափանումը կապել են տեխնիկական խնդրի հետ։
Դաշնային ավիացիոն վարչության ղեկավար Բրայան Բեդֆորդը ներողություն է խնդրել ուղևորներից՝ նշելով, որ համակարգն արդեն կայուն է։ Նրա կանխատեսմամբ՝ ավիաընկերությունների աշխատանքը հիմնականում կվերականգնվի մինչև կիրակի՝ նոյեմբերի 15-ի ուշ երեկո։
Խափանումը կրկին բարձրացրել է ԱՄՆ օդային երթևեկության կառավարման համակարգի արդիականացման հարցը։ Համակարգը տարիներ շարունակ առերեսվում է հնացած սարքավորումների, կապի խնդիրների և ավիադիսպետչերների պակասի։
Տրանսպորտի նախարար Շոն Դաֆին կոչ է արել 50 միլիարդ դոլար հատկացնել համակարգի արդիականացմանը՝ նախկինում պահանջված 30 միլիարդի փոխարեն։
«Սա արտակարգ իրավիճակ է»,- հայտարարել է նախարարը։
Պատմություններ
